കർഷകരുടെ റോഡ്​ ഉപരോധം തുടങ്ങി; നിരവധി നേതാക്കൾ കരുതൽ തടങ്കലിൽ

ന്യൂഡൽഹി: കാർഷിക നിയമങ്ങൾക്കെതിരായ കർഷകരുടെ ​മൂന്ന്​ മണിക്കൂർ നീണ്ട റോഡ്​ തടയൽ സമരം ആരംഭിച്ചു. സംസ്​ഥാന, ദേശീയ പാതകളാണ്​ കർഷകർ ഉപരോധിക്കുക. ഉച്ച 12 മുതൽ മൂന്നുവരെയാണ്​ റോഡ്​ ഉപരോധം.

ഹരിയാനയിലെ പാൽവാലിൽ കർഷകർ റോഡ്​ ഉപരോധിക്കുകയാണ്​. കൂടാതെ ഡൽഹി -രാജസ്​ഥാൻ അതിർത്തിയായ ഷാജഹാൻപൂരിലും കർഷകർ ഗതാഗതം തടഞ്ഞുതുടങ്ങി. പഞ്ചാബിലെ അമൃത്​സറിലും മൊഹാലിയിലും കർഷകർ റോഡിലിറങ്ങി. ​

കർഷകരുടെ ഗതാഗത സ്​തംഭനത്തിന്​ മുന്നോടിയായി ബംഗളൂരുവിലും ഡൽഹിയിലും കൂടുതൽ നേതാക്കളെ കരുതൽ തടങ്കലിലാക്കി. ബംഗളൂരുവിൽ 30 പേരെ കസ്റ്റഡിയിലെടുത്തു.

റോഡ്​ ഉപരോധ സമരത്തിന്‍റെ പശ്ചാത്തലത്തിൽ ഡൽഹിയിൽ നിരവധി നേതാക്ക​െള പൊലീസ്​ കസ്റ്റഡിയിലെടുത്തതായി ആൾ ഇന്ത്യ കിസാൻ മസ്​ദൂർ സഭ പറഞ്ഞു. സി.ഐ.ടി.യു ഡൽഹി നോർത്ത്​ ജില്ല വൈസ്​ പ്രസിഡന്‍റ്​ വിപിനെ ഡൽഹി പൊലീസ്​ കരുതൽ തടങ്കലിലാക്കി. ഐ.എഫ്​.ടി.യു ദേശീയ ട്രഷററും ഡൽഹി പ്രസിഡന്‍റുമായ ഡോ. അനിമേഷ്​​ ദാസിനെ കലക്​ജി പൊലീസ്​ പുല​ർച്ചെ​ അഞ്ചുമണിയോടെ കസ്റ്റഡി​യിലെടുത്തു. എ​.ഐ.ടി.യു.സി സെക്രട്ടറി ചൗരാശിയയും പൊലീസ്​ കസ്റ്റഡിയിലാണ്​.

അതേസമയം കർഷക സംഘടന നേതാക്കളെ അറസ്റ്റ്​​ ചെയ്​തതിൽ പ്രതിഷേധവുമായി സംഘടനകൾ രംഗത്തെത്തി. പ്രതിഷേധത്തെ തുടർന്ന്​ സി.പി.ഐ നേതാവ്​ ആനി രാജ ഉൾപ്പെടെയുള്ളവരെ പൊലീസ്​ അറസ്​റ്റ്​ ചെയ്​തു. പ്രധാനമന്ത്രി നരേന്ദ്രമോദിയും ആഭ്യന്തരമന്ത്രി അമിത്​ ഷായും ജനങ്ങളെ അടിച്ചമർത്താൻ ശ്രമിക്കുകയാണെന്ന്​ ആനി രാജ പറഞ്ഞു​.