ഇനി ലോക്​ഡൗണില്ല; കോവിഡിനെ പ്രതിരോധിക്കാൻ പുതിയ മാർഗങ്ങൾ തേടി പ്രധാനമന്ത്രി

ന്യൂഡൽഹി: കോവിഡ്​ 19 വൈറസ്​ ബാധയെ പ്രതിരോധിക്കാൻ കർശനമായ ലോക്​ഡൗൺ ഇനി ഏർപ്പെടുത്തില്ലെന്ന്​ സൂചന. ഇക്കണോമിക്​ ടൈംസാണ്​ ഇതുസംബന്ധിച്ച വാർത്ത റിപ്പോർട്ട്​ ചെയ്​തത്​. ക​ണ്ടെയ്​ൻമ​െൻറ്​ സോണുകളിൽ മാത്രം കർശന നിയന്ത്രണമേർപ്പെടുത്തി കോവിഡിനെ പ്രതിരോധിക്കാനായിരിക്കും സർക്കാർ ശ്രമം.

നഗരങ്ങളിലെ കണ്ടെയ്​​ൻമ​െൻറ്​ സോണുകളിൽ താമസിക്കുന്നവരെ കർശനമായി നിരീക്ഷിക്കും. ഇവർ സാമൂഹിക അകലം പാലിക്കു​ന്നതും മുഖാവരണം ധരിക്കുന്നതും​ ഉറപ്പാക്കുമെന്ന്​ കേന്ദ്ര സർവിസി​ലെ ഉന്നത ഉദ്യോഗസ്ഥൻ പറഞ്ഞു. ജൂൺ അവസാനത്തോടെ സംസ്ഥാനങ്ങളോട്​ ടെസ്​റ്റുകളുടെ എണ്ണം വർധിപ്പിക്കാൻ ആവശ്യപ്പെടും. ഗുരുതര സ്ഥിതിയിലെത്തുന്നതിന്​ മുമ്പ്​ തന്നെ രോഗികളെ ആശുപത്രികളിലെത്തിക്കാനുള്ള ശ്രമവും നടത്തും.

ജൂൺ 16നും 17നും മുഖ്യമന്ത്രിമാരുമായി പ്രധാനമന്ത്രി നരേന്ദ്രമോദി വിഡിയോ കോൺഫറൻസിങ്​ നടത്തുന്നതിന്​ മുന്നോടിയായാണ്​ പുതിയ റിപ്പോർട്ടുകൾ പുറത്ത്​ വരുന്നത്​. അതേസമയം, സംസ്ഥാന സർക്കാറുകൾക്ക്​ നിയന്ത്രണങ്ങൾ കർശനമാക്കാനുള്ള അനുവാദവും കേന്ദ്രം നൽകും.