സ്​കൂൾ ഉച്ചഭക്ഷണ പദ്ധതി വിഴുങ്ങി 'പി.എം പോഷൺ'

ന്യൂഡൽഹി: സ്​കൂൾ ഉച്ചഭക്ഷണ പദ്ധതിക്ക്​ രൂപമാറ്റം. ഒന്നു മുതൽ എട്ടു വരെ ക്ലാസുകളിൽ പഠിക്കുന്നവർക്ക്​ സൗജന്യ ഉച്ചഭക്ഷണം നൽകാനുള്ള 'പി.എം പോഷൺ ശക്തി നിർമാൺ' പദ്ധതി കേന്ദ്രമന്ത്രിസഭയുടെ സാമ്പത്തികകാര്യ സമിതി അംഗീകരിച്ചു. സർക്കാർ, എയ്​ഡഡ്​ സ്​കൂളുകൾ പദ്ധതിക്കു കീഴിൽ വരുമെന്ന്​ വാർത്തവിതരണ-പ്രക്ഷേപണ മന്ത്രി അനുരാഗ്​ ഠാക്കൂർ പറഞ്ഞു.

നിലവിലെ ഉച്ചഭക്ഷണപദ്ധതി പി.എം പോഷൺ ശക്തി നിർമാൺ പദ്ധതിയിൽ ലയിപ്പിക്കുമെന്ന്​ മന്ത്രി കൂട്ടിച്ചേർത്തു. പി.എം പോഷൺ പദ്ധതിക്കായി 2021-22 മുതൽ 2025-26 വരെ അഞ്ചു വർഷത്തേക്ക്​ 54,062 കോടിയാണ്​ കേന്ദ്രം ചെലവിടുക​. 31,733 കോടി സംസ്ഥാനങ്ങളുടെ വിഹിതമാണ്​. ഭക്ഷ്യധാന്യത്തിന്​ വേണ്ടി വരുന്ന 45,000 കോടി കേന്ദ്രം വഹിക്കും. ഇതടക്കം ആകെ പദ്ധതി ബജറ്റ്​ 1.30 ലക്ഷം കോടി രൂപയായിരിക്കും. രാജ്യത്തെ 11.20 ലക്ഷം സ്​കൂളുകളിലെ 11.80 കോടി കുട്ടികൾ പദ്ധതിയുടെ പരിധിയിൽ വരുമെന്നും മന്ത്രി വ്യക്തമാക്കി