ലോക്​ഡൗൺ ദുരിതം: നഷ്​ടപ്പെട്ട പ്രതിഛായ മിനുക്കിയെടുക്കാൻ പ്രചാരണത്തിനൊരുങ്ങി കേന്ദ്രം

ന്യൂഡൽഹി: ലോക്​ഡൗണിൽ കുടുങ്ങിയ അന്തർ സംസ്​ഥാന തൊഴിലാളികളുടെ ദുരിതം പ്രതിപക്ഷം ആയുധമാക്കുന്നത്​ തടയാൻ പ്രചാരണത്തിനൊരുങ്ങി കേന്ദ്ര സർക്കാർ. മോശമായ പ്രതിഛായ മിനുക്കിയെടുക്കാൻ രണ്ടാം മോദി സർക്കാറി​​െൻറ ഒന്നാം വാർഷികം ഉപയോഗിക്കാനാണ്​ നീക്കമെന്ന്​ എൻ.ഡി.ടി.വി റിപ്പോർട്ട്​ ചെയ്യുന്നു. 

അന്തർസംസ്​ഥാന തൊഴിലാളികളടക്കമുള്ളവർക്കായി കേന്ദ്രസർക്കാറി​​െൻറ ക്ഷേമ നടപടികൾ ഉൾകൊള്ളിച്ച്​ ബുക്ക്​ലെറ്റ്​ തയാറാക്കാനും ഇത്​ വിപുലമായി പ്രചരിപ്പിക്കാനുമാണ്​ ആസൂത്രണം ചെയ്യുന്നത്​. ദരിദ്രർ, സ്​ത്രീകൾ, കർഷകർ, യുവാക്കൾ തുടങ്ങിയവർക്കായി ഒാരോ മ​ന്ത്രാലയത്തിന്​ കീഴിലും നടത്തിയ പ്രവർത്തനങ്ങൾ പ്രത്യേകമായി വിവരിക്കുന്ന രൂപത്തിലാണ്​ ബുക്ക്​ലെറ്റ്​ തയാറാക്കുന്നത്​. 

മുന്നൊരുക്കങ്ങളില്ലാതെ പ്രഖ്യാപിച്ച ലോക്​ഡൗണിൽ നിരവധി അന്തർസംസ്​ഥാന തൊഴിലാളികളാണ്​ ദുരിതത്തിലായത്​. തൊഴിൽ ഇല്ലാതായതോടെ ഭക്ഷണത്തിനടക്കം ബുദ്ധിമുട്ടുന്ന അവസ്​ഥയിലായി തൊഴിലാളികൾ. നൂറു കണക്കിന്​ കിലോമീറ്റർ നടന്നി​ട്ടെങ്കിലും നാട്ടിലെത്തണം എന്നാഗ്രഹിച്ച്​ സ്​ത്രീകളും കുട്ടികളും അടക്കം യാത്ര തുടങ്ങിയത്​ സർക്കാറിനെ പ്രതിരോധത്തിലാക്കുകയും ചെയ്​തു. ഇങ്ങനെ നടക്കാൻ തുടങ്ങിയ നിരവധി പേരാണ്​ വഴിയിൽ മരണത്തിന്​ കീഴടങ്ങിയത്​. 

ഒടുവിൽ, അന്തർസംസ്​ഥാന തൊഴിലാളികളടക്കമുള്ളവർക്ക്​ നാട്ടിലേക്ക്​ മടങ്ങാൻ കേന്ദ്രസർക്കാർ ട്രെയിൻ  അനുവദിച്ചെങ്കിലും യാത്രക്കൂലിയെ ചൊല്ലിയുള്ള വിവാദവും സർക്കാറിന്​ തിരിച്ചടിയായി. തൊഴിൽ നഷ്​ടപ്പെട്ടതിനാൽ നാടണയാൻ ശ്രമിക്കുന്ന തൊഴിലാളികളിൽ നിന്ന്​ ട്രെയിൻ ചാർജ്​ ഈടാക്കാനുള്ള തീരുമാനമാണ്​ സർക്കാറിന്​ വിനയായത്​. തൊഴിലാളികളുടെ ടിക്കറ്റ്​ ചാർജ്​ തങ്ങൾ നൽകാമെന്ന്​ പ്രഖ്യാപിച്ച്​ കർണാടക കോൺഗ്രസ്​ തുടക്കമിട്ട പ്രതിഷേധം രാജ്യത്താകെയുള്ള കോൺഗ്രസ്​ പാർട്ടി ഏറ്റെടുത്തത്​ വലിയ പ്രതിഛായ നഷ്​ടമാണ്​ കേന്ദ്ര സർക്കാറിനുണ്ടാക്കിയത്​. 

അന്തർ സംസ്​ഥാന തൊഴിലാളികളുടെയും മറ്റു ചെറിയ വരുമാനക്കാരുടെയും ദുരിതം കേന്ദ്രസർക്കാറിനെതിരായ ജനവികാരമായി വളർന്ന്​ വരുന്നത്​ തടയാൻ കഴിയുന്ന വിധത്തിലുള്ള പ്രചാരണത്തിനാണ്​ ഒരുങ്ങുന്നത്​്​. രണ്ടാം മോദി സർക്കാറി​​െൻറ ഒന്നാം വാർഷികം ഇതിന്​ മറയാകും.