മംഗളൂരുവിൽ എൻഫോഴ്സ്മെന്റ് ഡയറക്ടറേറ്റ് ഉപമേഖല ഓഫിസ് തുറന്നു

മംഗളൂരു: എൻഫോഴ്സ്മെൻറ്​ ഡയറക്ടറേറ്റ് സബ് സോണൽ ഓഫിസ് മംഗളൂരുവിൽ തുറന്നു. കങ്കനടിയിൽ സെൻട്രൽ എക്സൈസ് ഇ-ഏഴ് ക്വാർട്ടേഴ്സിലാണ് താൽക്കാലിക പ്രവർത്തനം.

ബംഗളൂരു മേഖല ഓഫീസി​െൻറ കീഴിലാണ് ഈ ഉപ മേഖല ഓഫീസ് പ്രവർത്തിക്കുകയെന്ന് ഇ.ഡി വാർത്ത കുറിപ്പിൽ അറിയിച്ചു.

കർണാടകയിലെ ദക്ഷിണ കന്നട, ബഗൽകോട്ട്, ബെൽഗാം, ബെല്ലാരി, ബിദർ, ബിജാപൂർ, ഗഡഗ്, ഹാവേരി, ദാവൺഗരെ, ധാർവാഡ്, ഗുൽബർഗ, ഉത്തര കന്നട, കൊപ്പൽ, ഉടുപ്പി, റയ്ച്ചൂർ എന്നിങ്ങനെ 15 ജില്ലകളാണ് മംഗളൂരു ഓഫിസ് പരിധിയിൽ വരുക.

ഡെപ്യൂട്ടി ഡയറക്ടർ റാങ്കിലുള്ള ഉദ്യോഗസ്ഥനാണ് ഓഫിസ് തലവൻ. മേഘാലയയിലെ ഷില്ലോങ്, മണിപ്പൂരിലെ ഇംഫാൽ എന്നിവിടങ്ങളിൽ ഈയിടെ ഇ.ഡി ഉപ മേഖല കാര്യാലയങ്ങൾ തുറന്നിരുന്നു.