കേരളത്തിലെ കോവിഡ്​ കണക്കിൽ വൻ പൊരുത്തക്കേടെന്ന്​ കേന്ദ്രം

ന്യൂഡൽഹി: കോവിഡ്​ മരണങ്ങൾ റിപ്പോർട്ടു ചെയ്യുന്നതിൽ കേ​രളം സ്വീകരിക്കുന്ന രീതിക്കെതിരെ കേന്ദ്ര ആരോഗ്യ മന്ത്രാലയം. മുൻകാലങ്ങളിൽ റിപ്പോർട്ടു ചെയ്യാതിരുന്നവ കഴിഞ്ഞ മാസങ്ങളിലെ കണക്കിൽ ഉൾപ്പെടുത്തുന്നത്​ അശാസ്​ത്രീയവും, കോവിഡ്​ പ്രതിരോധ പ്രവർത്തനങ്ങളെത്തന്നെ ബാധിക്കുന്നതുമാണെന്ന്​ മന്ത്രാലയം കുറ്റപ്പെടുത്തി. നവംബർ 22 വരെ ഒരു മാസം​ കേരളം റിപ്പോർട്ട്​ ചെയ്​തത്​ 8,684 കോവിഡ്​ മരണങ്ങളാണ്​. ഇത്​ യഥാർഥമല്ല. ഒരു മാസത്തിനിടെ ഇത്ര മരണം നടന്നിട്ടില്ല. 2020 മാർച്ച്​ മുതൽ 2021 ജൂൺ വരെ​ റിപ്പോർട്ട്​ ചെയ്യാതിരുന്ന മരണങ്ങളത്രയും കഴിഞ്ഞ മൂന്നു മാസത്തെ പട്ടികയിൽ ചേർക്കുകയാണ്​.

കോവിഡ്​ പ്രതിരോധ മികവിൽ അഭിമാനിച്ച സർക്കാറാണ്​ ഇപ്പോൾ മരണങ്ങളുടെ വലിയ കണക്ക്​ മുന്നോട്ടുവെക്കുന്നത്​. മെച്ചപ്പെട്ട പ്രതിരോധ നടപടികൾ വഴി ഏറ്റവും കുറഞ്ഞ മരണ നിരക്കാണ്​ കേരളത്തിൽ​ എന്നായിരുന്നു അവകാശവാദം. നേരത്തെ നൽകിയ കണക്കുകളിലെല്ലാം കോവിഡ്​ ബാധിതർ കൂടുതലും മരണം കുറവുമായിരുന്നു. 2021 ഏപ്രിൽ 21ന്​ രാജ്യത്തെ കോവിഡ്​ രോഗികളിൽ 6.2 ശതമാനം മാത്രമാണ്​ കേരളത്തിൽ എന്ന കണക്കാണ്​ നൽകിയത്​. മരണം 1.4 ശതമാനവും. മേയ്​ 21ന്​ കോവിഡ്​ ബാധിതർ 10.6 ഉം മരണം 2.8ഉം ശതമാനം ആയിരുന്നു. എന്നാൽ, പിന്നീട്​ മരണസംഖ്യ കുത്തനെ ഉയർന്നു. ആഗസ്​റ്റ്​ 21ന്​ നൽകിയ കണക്കിൽ മൊത്തം കോവിഡ്​ ബാധിതരിൽ 56.9 ശതമാനവും ആകെ മരണങ്ങളിൽ 26.9 ശതമാനവും കേരളത്തിലാണെന്നാണ്​. സെപ്​റ്റംബർ 21 ആയപ്പോൾ കോവിഡ്​ ബാധിതർ 65.1 ശതമാനവും മരണത്തിൽ 45.2 ശതമാനവും കേരളത്തിൽ ആണെന്നായി. നവംബർ 21ന്​ മൊത്തം കോവിഡ്​ ബാധിതരിൽ 56.6 ഉം മരണ സംഖ്യയുടെ 77.4ഉം ശതമാനം കേരളത്തിലാണ്​​.

കോവിഡ്​ കണക്ക്​ ദിനേന സുതാര്യമായി കേന്ദ്രത്തെ അറിയിക്കണമെന്നാണ്​ വ്യവസ്​ഥയെന്ന്​ ആരോഗ്യ മന്ത്രാലയം വിശദീകരിച്ചു. കേരളത്തി​ൽ കോവിഡ്​ കണക്കു രേഖപ്പെടുത്തുന്നതിലും മരണം റിപ്പോർട്ടു ചെയ്യുന്നതിലും വലിയ വീഴ്​ചയാണ്​ ഉണ്ടായിരിക്കുന്നതെന്നും മന്ത്രാലയം കുറ്റപ്പെടുത്തി.