നരേന്ദ്ര ഗിരിയുടെ മരണത്തിൽ മൂന്ന്​ പേർക്കെതിരെ സി.ബി.ഐ കുറ്റപത്രം

ന്യൂഡൽഹി: അഖില ഭാരതീയ അഖാഡ പരിഷത്​ സന്യാസി അചാര്യ നരേന്ദ്ര ഗിരിയുടെ മരണവുമായി ബന്ധപ്പെട്ട കേസിൽ സി.ബി.ഐ കുറ്റപത്രം സമർപ്പിച്ചു. നരേന്ദ്ര ഗിരിയുടെ ശിഷ്യനായ ആനന്ദ്​ ഗിരിയും മറ്റ്​ രണ്ട്​ പേരുമാണ്​ കേസിലെ പ്രതികൾ. ക്രിമനൽ ഗൂഢാലോചന, ആതമഹത്യ പ്രേരണക്കുറ്റം എന്നിവയാണ്​ പ്രതികൾക്കെതിരെ ചുമത്തിയിരിക്കുന്നത്​. യു.പി സർക്കാറിന്‍റെ നിർദേശ പ്രകാരണമാണ്​ നരേന്ദ്ര ഗിരിയുടെ മരണത്തിലെ അന്വേഷണം സി.ബി.ഐ ഏറ്റെടുത്തത്​.

ഇക്കഴിഞ്ഞ സെപ്​തംബർ 20ന്​ അലഹബാദിലെ ബാഗാംഭരി മഠത്തിലാണ്​ നരേന്ദ്ര ഗിരിയെ മരിച്ചനിലയിൽ കണ്ടെത്തിയത്. നരേന്ദ്ര ഗിരിയുടെ മരണത്തെ സംബന്ധിച്ച്​ ആരോപണങ്ങൾ ഉയർന്നതോടെ യു.പി സർക്കാർ കേസ്​ സി.ബി.ഐക്ക്​ വിട്ടു. ആനന്ദ്​ ഗിരിക്ക്​ പുറമേ അലഹബാദ്​ ബാദേ ഹനുമാൻ ക്ഷേത്രത്തിലെ പൂജാരി ആദ്യ തിവാരി മകൻ സന്ദീപ്​ തിവാരി എന്നിവരും കേസിൽ പ്രതികളാണ്​.

നരേന്ദ്ര ഗിരിയുടെ ആത്​മഹത്യ കുറിപ്പിലും ഈ മൂന്ന്​ പേരുകൾ പരാമർശിച്ചിരുന്നു. തുടർന്ന്​ മൂന്ന്​ പേരെയും സി.ബി.ഐ അറസ്റ്റ് ചെയ്​തു​. നിലവിൽ പ്രതികൾ ജുഡീഷ്യൽ കസ്റ്റഡിയിലാണുള്ളത്​.