കുട്ടികളെ പീഡിപ്പിച്ച്​ ദൃശ്യങ്ങൾ ഡാർക്​നെറ്റിൽ വിൽപന നടത്തുന്ന സർക്കാർ എഞ്ചിനീയർ യു.പിയിൽ പിടിയിൽ

ലഖ്​നോ: അമ്പതോളം കുട്ടികളെ പീഡിപ്പിച്ച സർക്കാർ എഞ്ചിനീയറെ ഉത്തർപ്രദേശിൽ സി.​ബി.​െഎ അറസ്​റ്റ്​ ചെയ്​തു. കുട്ടികളെ പീഡിപ്പിക്കുന്ന ദൃശ്യങ്ങൾ കാമറയിൽ പകർത്തി അവ ഡാർക്​നെറ്റിലൂടെ വിൽപന നടത്തുകയായിരുന്നു ഇയാളുടെ പതിവ്​. ഇയാളുടെ താമസ സ്​ഥലത്തു നിന്ന്​ മൊബൈൽ ഫോണുകൾ, എട്ടു ലക്ഷം രൂപം, രതി ഉപകരണങ്ങൾ, നിരവധി പീഡന ദൃശ്യങ്ങൾ എന്നിവ അന്വേഷണ സംഘം കണ്ടെടുത്തു.

ഉത്തർ പ്രദേശിലെ ചിത്രകൂട്ട്​ സ്വദേശിയായ രാംഭവാൻ ആണ്​ സി.ബി.​െഎയുടെ പിടിയിലായത്​. അഞ്ചു വയസു മുതൽ 16 വയസുവരെ പ്രായമുള്ളവരാണ്​ ഇയാളുടെ ഇരകൾ. പത്തുവർഷത്തിനിടെ ബാന്ദ, ചിത്രകൂട്ട്​, ഹാമിർപൂർ ജില്ലകളിൽ നിന്നായാണ്​ ഇയാൾ ഇരകളെ കണ്ടെത്തിയിരുന്നത്​. പീഡിപ്പിച്ച വിവരം പുറത്തു പറയാതിരിക്കാൻ മൊബൈൽ ഫോണുകളും മറ്റു ഇലക്​ട്രോണിക്​ ഗാഡ്​ജറ്റുകളും കുട്ടികൾക്ക്​ നൽകിയിരുന്നതായി ഇയാൾ അന്വേഷണ സംഘ​ത്തോട്​ പറഞ്ഞു. ഇയാൾ പകർത്തിയിരുന്ന പീഡന ദൃശ്യങ്ങൾ ഡാർക്​ നെറ്റിലൂടെ വിൽപന നടത്തി പണം സമ്പാദിച്ചിരുന്നതായും അന്വേഷണസംഘം പറഞ്ഞു.

ലോകമാകെ വ്യാപിച്ച ബാലലൈംഗിക മാഫിയയുടെ ഭാഗമായിരുന്നു ഇയാൾ എന്നതിനാൽ കേസിൽ മറ്റു പ്രതികൾ ഉണ്ടാകാനുള്ള സാധ്യത അന്വേഷണ സംഘം സംശയിക്കുന്നുണ്ട്​. കുറ്റകൃത്യത്തിൽ ബന്ധമുള്ള മറ്റുള്ളവരെ കണ്ടെത്തുന്നതിന്​ മൊബൈൽ ഫോണുകളും ലാപ്​ടോപ്പുകളും ശാസ്​ത്രീയ പരിശോധന നടത്താൻ ഒരുങ്ങുകയാണ്​ അന്വേഷണ സംഘം. ഇയാളുമായി ഇ മെയിലിൽ ബന്ധപ്പെട്ട ആളുകളുടെ വിശദാംശങ്ങളും പരിശോധിക്കുന്നുണ്ട്​. ഇന്ത്യക്കകത്തും പുറത്തും നിന്നുള്ള ആളുകൾ ഇയാളുമായി ബന്ധപ്പെട്ടിട്ടുണ്ട്​.