ജാർഖണ്ഡിലെ ജഡ്​ജിയുടെ മരണം; വിവരം നൽകുന്നവർക്ക്​ അഞ്ച്​ ലക്ഷം രൂപ പ്രഖ്യാപിച്ച്​ സി.ബി.ഐ

ന്യൂഡൽഹി: ജാർഖണ്ഡിലെ ജഡ്​ജിയുടെ മരണവുമായി ബന്ധപ്പെട്ട്​ വിവരം നൽകുന്നവർക്ക്​ അഞ്ച്​ ലക്ഷം രൂപ ഇനാം പ്രഖ്യാപിച്ച്​ സി.ബി.ഐ. ധൻബാദ്​ നഗരത്തിൽ ഇതുമായി ബന്ധപ്പെട്ട സി.ബി.ഐയുടെ പോസ്റ്ററുകൾ നിറഞ്ഞു. ലഭ്യമാക്കുന്ന വിവരങ്ങൾ രഹസ്യമായി സൂക്ഷിക്കുമെന്നും സി.ബി.ഐ അറിയിക്കുന്നു.

ധൻബാദ്​ അഡീഷണൽ സെഷൻസ്​ ജഡ്​ജി ഉത്തം ആനന്ദ്​ ജൂലൈ 28 2021നാണ്​ കൊല്ലപ്പെട്ടത്​. ഏകദേശം അഞ്ച്​ മണിയോടെയായിരുന്നു സംഭവം. രൺദീർ പ്രസാദ്​ വർമ്മ ചൗക്കിലൂടെ നടക്കുകയായിരുന്ന അദ്ദേഹത്തെ ഓ​ട്ടോയിലെത്തിയവർ ഇടിച്ചു വീഴ്​ത്തി. ഇൗ കൊലപാതകത്തെ കുറിച്ച്​ എന്തെങ്കിലും വിവരം ലഭിക്കുന്നവർ ഉടൻ അറിയിക്കണമെന്ന്​ സി.ബി.ഐ നോട്ടീസിൽ പറയുന്നു.

ആഗസ്റ്റ്​ നാലിനാണ്​ സെഷൻസ്​ ​ജഡ്​ജിയുടെ കൊലപാതകവുമായി ബന്ധപ്പെട്ട കേസ്​ സി.ബി.ഐ ഏറ്റെടുത്തത്​. ജഡ്​ജിയുടെ മരണവുമായി ബന്ധപ്പെട്ട് നേരത്തെ​ രണ്ട്​ പേർ സി.ബി.ഐയുടെ പിടിയിലായിരുന്നു.