ചോദ്യപേപ്പറിലും വ്യാജൻ; ഓൺലൈനിൽ വിൽക്കാൻ ശ്രമിച്ചയാൾക്കെതിരെ കേസെടുത്തു

ഇന്ദോർ: മധ്യപ്രദേശ് പബ്ലിക് സർവിസ് കമീഷൻ ഞായറാഴ്ച നടത്തിയ പരീക്ഷയുടെ ചോദ്യ​പേപ്പർ എന്നവകാശപ്പെട്ട് വ്യാജ ചോദ്യപേപ്പർ ഓൺലൈനിൽ വിൽക്കാൻ ശ്രമിച്ച അജ്ഞാതനെതിരെ പൊലീസ് കേസെടുത്തു. ​

പ്രാഥമിക ഘട്ട പരീക്ഷയുടെ ചോർന്ന ചോദ്യ​േപപ്പർ എന്ന അവകാശവാദവുമായി സമൂഹ മാധ്യമ പ്ലാറ്റ്ഫോമായ ടെലിഗ്രാമിലാണ് ​വിൽപനക്ക് ശ്രമം നടന്നത്. 2500 രൂപയാണ് ചോദ്യപേപ്പറിന് വിലയിട്ടത്. ഒരു ഉദ്യോഗാർഥിയാണ് ഇക്കാര്യം പുറത്തെത്തിച്ചത്.

പണമടക്കാൻ ക്യൂ.ആർ കോഡും നൽകിയിരുന്നതായി ഉദ്യോഗാർഥി പറഞ്ഞു. ഞായറാഴ്ച നടന്ന പരീക്ഷയുടെ യഥാർഥ ചോദ്യപേപ്പറുമായി ടെലിഗ്രാമിൽ പ്രചരിച്ച ചോദ്യ​േപപ്പർ ഒത്തുനോക്കിയപ്പോൾ വ്യാജമാണെന്ന് തെളിഞ്ഞതായി എം.പി.പി.എസ്.സി ഓഫിസർ ഓൺ സ്​പെഷൽ ഡ്യൂട്ടി രവീന്ദ്ര പഞ്ച്ഭായ് പറഞ്ഞു. ഡെപ്യൂട്ടി കലക്ടർ ഉൾപ്പെടെ 110 തസ്തികകളിലേക്കുള്ള പരീക്ഷ 1.83 ലക്ഷം ഉദ്യോഗാർഥികളാണ് എഴുതിയത്.