പോരാടുന്നത്​ അദൃശ്യനായ ശത്രുവിനോട്​; ദുരിതത്തിലായ ജനങ്ങളുടെ വേദന തനിക്കറിയാമെന്ന്​ മോദി

ന്യൂഡൽഹി: കോവിഡെന്ന അദൃശ്യനായ ശത്രുവിനോടാണ്​ ഇന്ത്യയുടെ പോരാട്ടമെന്ന്​ പ്രധാനമന്ത്രി നരേന്ദ്ര മോദി. രോഗം മൂലം ദുരിതത്തിലായവരുടെ വേദന തനിക്കറിയാമെന്നും മോദി പറഞ്ഞു. ഒരു ഓൺലൈൻ പരിപാടിയിൽ പ​ങ്കെടുത്ത്​ സംസാരിക്കു​േമ്പാഴാണ്​ മോദി വീണ്ടും കോവിഡിനെ കുറിച്ച്​ പ്രതികരിച്ചത്​.

കൊറോണ വൈറസ്​ മൂലം നമുക്ക്​ അടുത്ത പരിചയമുള്ള പലരേയും നഷ്​ടമായി. രാജ്യത്തെ പൗരൻമാർ അനുഭവിക്കുന്ന വേദന എനിക്കറിയാം. പൗരൻമാരുടെ അതേ വേദന താനും അനുഭവിക്കുന്നുണ്ടെന്ന്​ മോദി പറഞ്ഞു. അദൃശ്യനായ ശത്രുവിനോടാണ്​ നാം പോരാടുന്നത്​. വൈറസി​ന്​ നിരവധി തവണ ജനിതക വകഭേദം സംഭവിച്ച്​ കഴിഞ്ഞു. 100 വർഷത്തിനിടയിലെ ഏറ്റവും വലിയ പകർച്ചവ്യാധിയിലൂടെയാണ്​ ലോകം കടന്നു പോകുന്നതെന്നും മോദി വ്യക്​തമാക്കി.

രാജ്യത്തെ എല്ലാ ജനങ്ങൾക്കും വാക്​സിൻ നൽകാനുള്ള പ്രവർത്തനങ്ങൾ സർക്കാർ ത്വരിതപ്പെടുത്തും. ഇതുവരെ 18 കോടി പേർക്ക്​ വാക്​സിൻ നൽകിയിട്ടുണ്ട്​. സർക്കാർ ആശുപത്രികൾ സൗജന്യമായാണ്​ വാക്​സിൻ നൽകുന്നത്​. നിങ്ങളുടെ അവസരം വരു​േമ്പാൾ വാക്​സിൻ എടുക്കണം. വാക്​സിൻ കോവിഡിനെതിരെയുള്ള പ്രതിരോധ കവചമാണ്​. എന്നാൽ, വാക്​സിനെടുത്ത ശേഷവും മാസ്​ക്​, സാമൂഹിക അകലം എന്നിവ മറക്കരുതെന്നും മോദി ഓർമിപ്പിച്ചു.

കോവിഡ്​ പ്രതിരോധത്തിൽ കേന്ദ്രസർക്കാറിനെതിരെ വ്യാപക പ്രതിഷേധം ഉയരുന്നതിനിടെയാണ്​ ഇക്കാര്യത്തിൽ പ്രധാനമന്ത്രിയുടെ പ്രതികരണം. രണ്ടാം തരംഗം ഉണ്ടാവുന്നത്​ മുൻകൂട്ടി കണ്ട്​ പ്രതിരോധം ഒരുക്കുന്നതിൽ സർക്കാർ പരാജയപ്പെട്ടുവെന്നാണ്​ വിമർശനം.