കേംബ്രിഡ്​ജ്​ അനലറ്റികക്ക്​ കോൺഗ്രസുമായി ബന്ധമെന്ന്​ വെളിപ്പെടുത്തൽ

ന്യൂഡൽഹി: ഫേസ്​ബുക്കിലെ വിവരചോർച്ചയിൽ ഉൾപ്പെട്ട സ്ഥാപനം കേംബ്രിഡ്​ജ്​ അനലറ്റികക്ക്​ കോൺഗ്രസുമായി ബന്ധമുണ്ടെന്ന്​ വെളിപ്പെടുത്തൽ. ഇന്ത്യയിൽ ഒാഫീസ്​ തുറന്ന്​ സ്ഥാപനം പ്രവർത്തിച്ചിരുന്നുവെന്ന്​ കേംബ്രിഡ്​ജ്​ അനലറ്റിക്കയിലെ മുൻ ജീവനക്കാരനായ ക്രിസ്​റ്റഫർ വൈലി വെളിപ്പെടുത്തി​. നിയമക്കുരുക്കുകളെ കുറിച്ച്​ ചിന്തിക്കാത്ത ഒരുപറ്റം ജീവനക്കാരാണ്​ ​സ്ഥാപനത്തിനായി പ്രവർത്തിക്കുന്നതെന്നും അദ്ദേഹം വ്യക്​തമാക്കി. 

കേംബ്രിഡ്​ജ്​ അനലറ്റികയുമായി ബന്ധമുണ്ടായിരുന്ന ഇന്ത്യയിലെ ഒരു  രാഷ്​ട്രീയ പാർട്ടി കോൺഗ്രസായിരുന്നുവെന്ന്​ സൂചനയാണ്​ വൈലി നൽകുന്നത്​. എന്നാൽ ദേശീയതലത്തിൽ കോൺഗ്രസ്​ സ്ഥാപനത്തെ ഉ​പയോഗപ്പെടുത്തിയിട്ടില്ലെന്നും വൈലി വെളിപ്പെടുത്തി. പ്രാദേശിക തലത്തിലായിരുന്നു കോൺഗ്രസ്​ അനലറ്റിക്കയെ ഉപേയാഗപ്പെടുത്തിയത്​. കേംബ്രിഡ്​ജ്​ അനലറ്റിക്കയുടെ ഇന്ത്യയിലെ ഇടപെടൽ സംബന്ധിച്ച്​ തെളിവുകൾ കൈവശമുണ്ടെന്നും അദ്ദേഹം വ്യക്​തമാക്കി.

വ്യാജവാർത്തകളിലൂടെയും തെറ്റായ വിവരങ്ങളിലൂടെയും ജനങ്ങളെ സ്വാധീനിക്കുകയാണ്​ സ്ഥാപനം ചെയ്യുന്നതെന്നും വൈലി പറഞ്ഞു. നേരത്തെ കേംബ്രിഡ്​ജ്​ അനലറ്റിക്കയുമായുള്ള ബന്ധത്തെ സംബന്ധിച്ച്​ കോൺഗ്രസും ബി.ജെ.പിയും പരസ്​പരം ആരോപണ പ്രത്യാരോപണങ്ങളുമായി രംഗത്തെത്തിയിരുന്നു.