പ്രതിഷേധം രാജ്യവ്യാപകം​; കൂടുതൽ സംസ്ഥാനങ്ങളിൽ നിരോധനാജ്ഞ

ന്യൂഡൽഹി: ദേശീയ പൗരത്വ ഭേദഗതി നിയമത്തിനെതിരെ പ്രതിഷേധം രാജ്യവ്യാപകമാകുന്നു. പ്രതിഷേധത്തെ തുടർന്ന്​ കൂടുതൽ സംസ്ഥാനങ്ങളിൽ പൊലീസ്​ നിരോധനാജ്ഞ പുറപ്പെടുവിച്ചു. ഈസ്​റ്റ്​ ഡൽഹി, ഉത്തർപ്രദേശ്​, കർണാടക എന്നിവിടങ്ങളിൽ മൂന്നു ദിവസത്തേക്കാണ്​ നിരോധനാജ്ഞ​ പുറപ്പെടുവിച്ചിരിക്കുന്നത്​. ഡൽഹിയിലെ എട്ട്​ മെട്രോ സ്​റ്റേഷനുകൾ ​താൽക്കാലികമായി അടച്ചു. മിക്ക നഗരങ്ങളിലും റാലികളും പ്രതിഷേധ പ്രകടനങ്ങളും നടത്തുന്നതിന്​ പൊലീസ്​ വിലക്ക്​ ഏർപ്പെടുത്തിയിട്ടുണ്ട്​.

ഡൽഹിയിലെ മണ്ഡി ഹൗസിൽ നിന്നും ജന്തർ മന്ദിറിലേക്ക്​ ഇടതുപക്ഷ പാർട്ടികൾ നടത്താനിരുന്ന പ്രതിഷേധ മാർച്ചിന്​ പൊലീസ്​ അനുമതി നിഷേധിച്ചു. ‘ഹം ഭക്ത്​ കി ലോഗ്​’ എന്ന പേരിൽ ലാൽ ഖിലയിൽ നിന്നും ഷഹീദ്​ ഭഗത്​ സിങ്​ പാർക്കിലേക്ക്​ നടത്താനിരുന്ന റാലിക്കാണ്​ അനുമതി നിഷേധിച്ചത്​.

മുംബൈയിലും പ്രതിപക്ഷ പാർട്ടികളുടെ നേതൃത്വത്തിൽ വൻ റാലി നടക്കും. ആഗസ്​ത്​ ക്രാന്തി മൈതാനത്തിൽ നടക്കുന്ന മെഗാ റാലിയിൽ ബോളിവുഡ്​ താരങ്ങൾ ഉൾപ്പെടെയുള്ളവർ പങ്കാളികളാകും. ​

കൊൽക്കത്തയിൽ സി.പി.എം, കോൺഗ്രസ്​ പാർട്ടികളുടെ മാർച്ച്​ ഇന്ന്​ നടക്കും. മിക്ക നഗരങ്ങളിലും ഇൻറർനെറ്റ്​ വിഛേദിച്ചിട്ടുണ്ട്​.

ഹൈദരാബാദ്​ പൊലീസും പ്രതിഷേധ മാർച്ചുകൾക്ക്​ അനുമതി നിഷേധിച്ചിട്ടുണ്ട്​. പൗരത്വ ഭേദഗതി നിയമത്തിനെതിരെ ഒരു തരത്തിലുളള റാലികൾക്കും അനുമതി നൽകില്ലെന്നും സാമൂഹിക മാധ്യമങ്ങളിലൂടെയോ മറ്റ്​ സംവിധാനങ്ങളിലൂടെയോ മാർച്ചുകളോ റാലികളോ ആഹ്വാനം ചെയ്യരുതെന്നും പൊലീസ്​ അറിയിച്ചു.

സംഘർഷ സാധ്യത കണക്കി​െലടുത്ത്​ ​ബംഗളൂരുവിലെ ടൗൺ ഹാൾ പരസിസരത്ത്​ കൂടുതൽ പൊലീസിനെ വിന്യസിച്ചിട്ടുണ്ട്​.

ഉത്തർപ്രദേശിൽ നിരോധനാഞ്​ജ പ്രഖ്യാപിച്ചതിനെ തുടർന്ന്​ പൊലീസ്​ സുരക്ഷ ശക്തമാക്കി. യോഗം ചേരുന്നതിനും പ്രതിഷേധ പരിപാടികൾ സംഘടിപ്പിക്കുന്നതിനും പൊലീസ്​ വിലക്ക്​ ഏർപ്പെടുത്തിയിട്ടുണ്ട്​.

ബിഹാറിൽ സി.പി.എം പ്രവർത്തകർ ലഹാരിഅരസായ്​ ​റെയിൽവേ സ്​റ്റേഷൻ ഉപരോധിച്ചു. പാട്​നയിൽ എ.ഐ.എസ്​.എഫ്​ പ്രവർത്തകർ രാജേന്ദ്ര നഗർ ​റെയിൽവേ സ്​റ്റേഷൻ ഉപരോധിക്കുകയും ട്രെയിൻ തടയുകയും ​െചയ്​തു.

ചെന്നൈയിലും പ്രതിഷേധ മാർച്ചുകൾക്ക്​ പൊലീസ്​ നിരോധനം ഏർപ്പെടുത്തി​. മദ്രാസ്​ സർവകലാശാലയിൽ പ്രതിഷേധ മാർച്ച്​ സംഘടിപ്പിച്ച 15 വിദ്യാർഥികളെ പൊലീസ്​ കസ്​റ്റഡിയിലെടുത്തു. തുടർന്ന്​ വിദ്യാർഥികൾ സർവകലാശാല പ്രവേശന കവാടം ഉപരോധിച്ച്​ കുത്തിയിരിപ്പ്​ സമരം നടത്തി. പൊലീസ്​ കസ്​റ്റഡിയിലെടുത്തവരെ പിന്നീട്​ വിട്ടയച്ചു.