ഡൽഹി മദ്യനയക്കേസ്: കെ. കവിത ഇ.ഡിക്ക് മുമ്പാകെ ഹാജരായി; ചോദ്യം ചെയ്യൽ രണ്ടാം തവണ

ന്യൂഡൽഹി: ഭാരത് രാഷ്ട്രീയ സമിതി എം.എൽ.സി കെ. കവിത ഡൽഹി എൻഫോഴ്സ്മെന്റ് ഡയറക്ടറേറ്റ് മുമ്പാകെ ഹാജരായി. ഡൽഹി മദ്യനയക്കേസുമായി ബന്ധപ്പെട്ടാണ് കവിത ഇ.ഡിക്ക് മുമ്പാകെ ഹാജരായത്. രണ്ടാം തവണയാണ് കേസുമായി ബന്ധപ്പെട്ട് ഇ.ഡി കവിതയെ ചോദ്യം ചെയ്യുന്നത്.

നാലു ദിവസസം മുമ്പ് ഇ.ഡിയുടെ സമൻസിൽ ഹാജരാകാൻ കവിത വിസമ്മതിച്ചിരുന്നു. ഡൽഹി മദ്യനയക്കേസിൽ ഇ.ഡി സമൻസ് അയക്കുന്നത് ചോദ്യം ചെയ്ത് കവിത നൽകിയ ഹരജിയിൽ വാദം കേൾക്കാമെന്ന് കഴിഞ്ഞ ആഴ്ച സുപ്രീം കോടതി സമ്മതിച്ചിരുന്നു. അതിനാൽ കേസ് കോടതിക്ക് മുമ്പാകെയാണെന്ന് ചൂണ്ടിക്കാട്ടിയാണ് കവിത ഇ.ഡി ക്ക് മുമ്പാകെ ഹാജരാകാൻ വിസമ്മതിച്ചിരുന്നത്.

നേരത്തെ മാർച്ച്11 ന് കവിതയെ ഇ.ഡി ചോദ്യം ചെയ്തിരുന്നു. തുടർന്ന് വീണ്ടും മാർച്ച് 16 ന് ഹാജരാകാൻ ആവശ്യപ്പെടുകയായിരുന്നു. കേസുമായി ബന്ധപ്പെട്ട് അറസ്റ്റിലായ ഹൈദരാബാദിലെ ബസിനസുകാരൻ അരുൺ രാമചന്ദ്ര പിള്ളയുമായി കവിതയുടെ ബന്ധം സംബന്ധിച്ചായിരുന്നു ചോദ്യങ്ങൾ. മാർച്ച് 11 ഒമ്പത് മണിക്കൂർ കവിതയെ ഇ.ഡി ചോദ്യം ചെയ്തിരുന്നു.