ഇന്ത്യാ സന്ദർശനം റദ്ദാക്കി, റിപ്പബ്ലിക് ദിന ചടങ്ങില്‍ ബോറിസ് ജോൺസൺ പങ്കെടുക്കില്ല

ന്യൂഡൽഹി: ബ്രിട്ടിഷ് പ്രധാനമന്ത്രി ബോറിസ് ജോൺസൺ ഇന്ത്യാ സന്ദർശനം റദ്ദാക്കി. ഇന്ത്യൻ സർക്കാരിന്‍റെ ക്ഷണമനുസരിച്ച് റിപ്പബ്ലിക് ദിന പരേഡിൽ പ്രധാന അതിഥിയായി പങ്കെടുക്കാനായിരുന്നു ബ്രിട്ടീഷ് പ്രധാനമന്ത്രി ഇന്ത്യയിലെത്തേണ്ടിയിരുന്നത്.

അതിതീവ്ര കോവിഡ് വൈറസ് ബ്രിട്ടനിൽ റിപ്പോർട്ട് ചെയ്തതിനെ തുടർന്ന് രാജ്യത്ത് ലോക്ഡൗൺ പ്രഖ്യാപിച്ചിരിക്കുകയാണ്. ഇതിനാൽ പ്രധാനമന്ത്രി സന്ദർശനം റദ്ദാക്കുമെന്ന് അഭ്യൂഹങ്ങൾ നിലനിന്നിരുന്നു.

ഇന്ന് രാവിലെ പ്രധാനമന്ത്രി നരേന്ദ്രമോദിയോട് ടെലഫോണിൽ സംസാരിക്കവെ സന്ദർശനം റദ്ദാക്കിയതിൽ ബോറിസ് ജോൺസൺ ഖേദം പ്രകടിപ്പിച്ചു.

സന്ദര്‍ശനം റദ്ദാക്കിയതായി വാര്‍ത്താ ഏജന്‍സിയാണ് റിപ്പോര്‍ട്ട് ചെയ്തത്. എന്നാല്‍ ഇത് വിദേശകാര്യ മന്ത്രാലയം സ്ഥിരീകരിച്ചിട്ടില്ല.