ജമ്മുവിൽ ഗ്രനേഡ്​ ആക്രമണം; ഒരു മരണം; 32 പേർക്ക്​ പരിക്ക്​

ജമ്മു: ജമ്മു നഗരഹൃദയത്തിലെ തിരക്കേറിയ ബസ്​സ്​റ്റാൻഡിൽ ശക്തമായ ഗ്രനേഡ്​ ആക്രമണം. ഭീകരവാദികളെന്നു​ സംശയിക്കു ന്നവർ നടത്തിയ ആക്രമണത്തിൽ 17കാരൻ കൊല്ലപ്പെട്ടു. 32 പേർക്ക്​ പരിക്കേറ്റു. ജമ്മു നഗരത്തിൽ കഴിഞ്ഞ മേയ്​ മുതൽ ഉണ്ടാ യ മൂന്നാമത്തെ ഗ്രനേഡ്​ ആക്രമണമാണിത്​. നഗരത്തിലെ സമുദായ സൗഹാർദം തകർക്കാനുള്ള ശ്രമമായാണ്​ ആ​ക്രമണത്തെ കാണുന്നതെന്ന്​ അധികൃതർ പറഞ്ഞു. സംഭവവുമായി ബന്ധപ്പെട്ട്​ ഹിസ്​ബുൽ മുജാഹിദീനുമായി ബന്ധമുണ്ടെന്ന്​ സംശയിക്കുന്ന യാസിൻ ജാവിദ്​ ഭട്ടിനെ അറസ്​റ്റ്​ചെയ്​തു.

വ്യാഴാഴ്​ച ഉച്ചയോടെ അജ്​ഞാതർ ബസ്​സ്​റ്റാൻഡിലേക്ക്​ ഗ്രനേഡ്​ എറിയുകയായിരുന്നു. ഇത്​ പൊട്ടിത്തെറിച്ച്​ ഗുരുതര പരിക്കേറ്റ്​ ആശുപത്രിയിൽ പ്രവേശിപ്പിച്ച ഉത്തരാഖണ്ഡിലെ ഹരിദ്വാർ സ്വദേശിയായ മുഹമ്മദ്​ ശാരിക്​ ആണ്​ മരിച്ചത്​. നാലു പേരുടെ നില ഗുരുതരമാണ്​. പരിക്കേറ്റവരിൽ 11 പേർ കശ്​മീരുകാരാണ്​. ബിഹാർ, ഹരിയാന, ഛത്തിസ്​ഗഢ്​​ സംസ്​ഥാനങ്ങളിൽനിന്നുള്ളവരാണ്​ മറ്റുള്ളവർ.

സ്​ഫോടനത്തിൽ ബസ്​സ്​റ്റാൻഡിലുണ്ടായിരുന്ന സർക്കാർ ബസ്​ പൂർണമായി തകർന്നു. കഴിഞ്ഞവർഷം ഡിസംബർ 28-29 തീയതികളിലായി ജമ്മു നഗരത്തിലെ പൊലീസ്​ സ്​റ്റേഷൻ ലക്ഷ്യമിട്ട്​ ഗ്രനേഡ്​ ആക്രമണമുണ്ടായിരുന്നു. ഇതിനുമുമ്പ്​ മേയ്​ 24ന്​ നടന്ന മറ്റൊരു ആക്രമണത്തിൽ ഒരു ​െപാലീസുകാരൻ ഉൾപ്പെടെ രണ്ടു പേർക്ക്​ പരിക്കേറ്റിരുന്നു.

സി.സി.ടി.വി ദൃശ്യത്തി​​െൻറയും ദൃക്​സാക്ഷികളുടെ മൊഴിയുടെയും അടിസ്​ഥാനത്തിലാണ്​ യാസിൻ ജാവിദ്​ ഭട്ടിനെ അറസ്​റ്റ്​ചെയ്​തതെന്ന്​ ജമ്മു ​െഎ.ജി എം.കെ. സിൻഹ പറഞ്ഞു. ഹിസ്​ബുൽ മുജാഹിദീൻ കുൽഗാം ജില്ല കമാൻഡർ ഫറൂഖ്​ ഭട്ടി​​െൻറ കൈയിൽനിന്നാണ്​ തനിക്ക്​ ഗ്രനേഡ്​ ലഭിച്ചതെന്ന്​ ഇദ്ദേഹം ചോദ്യംചെയ്യലിൽ പറഞ്ഞു. വ്യാഴാഴ്​ച രാവിലെയാണ്​ ഇയാൾ ജമ്മുവിലെത്തിയത്​. കനത്ത സുരക്ഷ ഏർപ്പെടുത്തിയിരിക്കുന്ന ഇൗ മേഖലയിൽ ദേഹപരിശോധന അടക്കം നടത്താറുണ്ടെങ്കിലും ഇതു മറികടന്ന്​ ആക്രമണം നടത്തിയത്​ എങ്ങനെയെന്ന്​ അന്വേഷിച്ചുവരുകയാണെന്നും അദ്ദേഹം വ്യക്തമാക്കി.