കർഷകർക്കായി ഒന്നും ചെയ്​തില്ല; യു.പി സർക്കാറിന്‍റെ കർഷക സമൃദ്ധി കമീഷനിൽനിന്ന്​ രാജി​

ലഖ്​നോ: കർഷകരുടെ പ്രശ്​നങ്ങൾ പരിഹരിക്കുന്നതിനായി ഉത്തർപ്രദേശ്​ സർക്കാർ രൂപീകരിച്ച കമീഷനിൽനിന്ന്​ ഭാരതീയ കിസാൻ യൂനിയൻ (ബി.കെ.യു) നേതാവ്​ ധർമേന്ദ്ര മാലിക്​ രാജ​ിവെച്ചു. കമീഷൻ രൂപീകരിച്ചതിന്​ ശേഷം ഒരു​ യോഗം പോലും ചേർന്നിട്ടില്ലെന്ന്​ ചൂണ്ടിക്കാട്ടിയാണ്​ രാജി. രാജിക്കത്ത്​ മുഖ്യമന്ത്രി യോഗി ആദിത്യനാഥിന്​ അയച്ചു.

കർഷകരുടെ പ്രശ്​നങ്ങൾ പരിഹരിക്കുന്നതിനായി 2017ലാണ്​ യു.പിയിൽ ക്രിഷക്​ സമൃദ്ധി ആയോഗ്​ (കർഷക സമൃദ്ധി കമീഷൻ) രൂപീകരിക്കുന്നത്​. കമീഷൻ രൂപകരിച്ചതിന്‍റെ ലക്ഷ്യങ്ങളിലൊന്നുപോലും പൂർത്തീകരിച്ചിട്ടില്ലെന്ന്​ മാലിക്​ കുറ്റപ്പെടുത്തി.

കമീഷനിലെ സർക്കാരിതര അംഗമാണ്​ മാലിക്​. കർഷക സംഘടനകളുടെ പ്രതിനിധിയായാണ്​ ഇദ്ദേഹത്തെ നാമനി​ർ​േദശം ചെയ്​തത്​. കേന്ദ്രസർക്കാറിന്‍റെ കാർഷിക നിയമങ്ങളുമായി ബന്ധപ്പെട്ട്​ യാതൊരു വിധ നിർദേശങ്ങളും കേന്ദ്രത്തിന്​ സമിതി അയച്ചിട്ടില്ലെന്നും അദ്ദേഹം പറഞ്ഞു.

'ഇന്ന്​ കാർഷിക നിയമങ്ങളുമായി ബന്ധപ്പെട്ട്​ കർഷകരും കേന്ദ്രവും മുഖാമുഖം നിൽക്കുന്നു. കൊടും ശൈത്യത്തെയും അവഗണിച്ച്​ മൂന്നുമാസമായി തെരുവിലാണ്​ കർഷകർ. കേന്ദ്രം ഇതുവരെ യാതൊരു പരിഹാരവും കണ്ടിട്ടില്ല. ഇത്രയും പ്രാധാന്യം അർഹിക്കുന്ന ഒന്നിൽ​േപാലും നിർദേശങ്ങൾ കേന്ദ്രത്തിന്​ അയക്കാൻ പാനൽ തയാറായില്ല. സംസ്​ഥാനസർക്കാർ കർഷകരുടെ അഭിപ്രായം ആരായാൻ മുതിർന്നില്ല. എന്തിനാണോ കമീഷൻ രൂപീകരിച്ച് അതിന്‍റെ യാതൊരു ലക്ഷ്യങ്ങളും പൂർത്തീകരിക്കാൻ കഴിഞ്ഞില്ലെന്നും മാലിക്​ പറഞ്ഞു.

ബി.കെ.യു എല്ലായ്​പ്പോയും കർഷകരുടെ പ്രശ്​നങ്ങൾ പരിഹരിക്കുന്നതിനും ക്ഷേമത്തിനും വേണ്ടിയാണ്​ പ്രവർത്തിക്കുന്നതെന്ന്​ അദ്ദേഹം കൂട്ടിച്ചേർത്തു.