യു.പി മന്ത്രിസഭയിൽ അഴിച്ചുപണി വരുന്നു; ബി.ജെ.പി നേതാവ്​ രാധ മോഹൻ സിങ്​ ഇന്ന്​ ഗവർണറെ കാണും

ന്യൂഡൽഹി: മുഖ്യമന്ത്രി യോഗി ആദിത്യനാഥി​െൻറ പ്രവർത്തനങ്ങളിൽ ബി.ജെ.പി ദേശീയ നേതൃത്വത്തിന്​ കടുത്ത അതൃപ്​തിയുണ്ടെന്ന റിപ്പോർട്ടുകൾക്കിടെ യു.പി മന്ത്രിസഭയിൽ അഴിച്ചുപണി വരുന്നു. ഇതുമായി ബന്ധപ്പെട്ട ചർച്ചകൾക്കായി യു.പിയുടെ ചുമതലയുള്ള ബി.ജെ.പി നേതാവ്​ രാധ മോഹൻ സിങ്​ ഇന്ന്​ സംസ്ഥാനത്തെത്തും. ഗവർണർ ആനന്ദിബെൻ പ​ട്ടേലുമായി അദ്ദേഹം കൂടിക്കാഴ്​ച നടത്തും. രാവിലെ 11 മണിക്കായിരിക്കും കൂടിക്കാഴ്​ച നടക്കുക.

രാധ മോഹൻ സിങ്ങും ബി.ജെ.പി ദേശീയ ജനറൽ സെക്രട്ടറി ബി.എൽ സ​ന്തോഷും കഴിഞ്ഞയാഴ്​ച യു.പിയിലെത്തിയിരുന്നു. ബി.ജെ.പി എം.എൽ.എമാരിൽ നിന്നും എം.പിമാരിൽ നിന്നും സർക്കാറി​െൻറ പ്രവർത്തനത്തെ കുറിച്ച്​ ചോദിച്ചറിയാനായിരുന്നു സന്ദർശനം. ഈ റിപ്പോർട്ട്​ കൂടി പരിഗണിച്ചാവും യു.പി മന്ത്രിസഭയിലെ മാറ്റങ്ങൾ.

മോദിയുടെ വിശ്വസ്​തരിൽ ഒരാളെ യു.പിയിൽ നിർണായക പദവി​യിലേക്ക്​ കൊണ്ടുവരാൻ നീക്കം നടക്കുന്നുവെന്ന വാർത്തകൾ പുറത്ത്​ വരുന്നുണ്ട്​. അതേസമയം, യു.പിയുടെ കോവിഡ്​ പ്രതിരോധ പ്രവർത്തനങ്ങളിൽ ബി.ജെ.പിക്ക്​ അതൃപ്​തിയുണ്ടെന്ന വാർത്തകളെ ദേശീയ നേതൃത്വം തള്ളി. സമാനതകളില്ലാത്ത പ്രവർത്തനമാണ്​​ കോവിഡിനെതിരെ യു.പി സർക്കാർ നടത്തിയതെന്ന്​ ബി.ജെ.പി നേതാവ്​ രാധ മോഹൻ സിങ്​ പറഞ്ഞു.