ഹഥ്​രസ്​ ബലാത്സംഗക്കൊല: പെൺകുട്ടി ബലാത്സംഗത്തെ കുറിച്ച്​ പറഞ്ഞില്ല; നാവ്​ മുറിക്കപ്പെട്ടിരുന്നില്ല -തമിഴ്​നാട്​ ബി.ജെ.പി നേതാവ്​

​ചെന്നൈ: ഹഥ്​രസിൽ കൂട്ടബലാത്സംഗക്കൊലക്ക്​ ഇരയായ പെൺകുട്ടിയുടെ ദൃശ്യങ്ങൾ പ്രചരിപ്പിക്കുകയും വ്യക്തിവിവരങ്ങൾ പങ്കുവെക്കുകയും അപകീർത്തികരമായ പരാമർശങ്ങൾ നടത്തുകയും ചെയ്​ത്​ തമിഴ്​നാട്​ ബി.ജെ.പി ​െഎ.ടി സെൽ കൺവീനർ നിർമൽ കുമാർ. കൂട്ടബലാത്സംഗത്തിനിരയായ പെൺകുട്ടി ആശുപത്രിയിലെ സ്​ട്രെച്ചറിൽ കിടക്കുന്ന ചിത്രവും വിഡിയോയുമാണ്​ നിർമൽ കുമാർ സാമൂഹിക മാധ്യമങ്ങളിൽ പങ്കുവെച്ചത്​.

വിഡിയോയിൽ പെൺകുട്ടി നന്നായി സംസാരിക്കുന്നുണ്ടെന്നും അവളുടെ നാവ് മുറിക്കപ്പെട്ടിട്ടില്ലെന്നും നിർമൽ വി​ഡിയോക്കൊപ്പം കുറിച്ചു. പെൺകുട്ടി 'ബലാത്സംഗ'ത്തെക്കുറിച്ച് ഒന്നും പരാമർശിച്ചിട്ടില്ലെന്നും നിർമൽ കൂട്ടിച്ചേർത്ത​​ു. പെൺകുട്ടിയുടെ മുഖം വ്യക്തമാകുന്ന ദൃശ്യങ്ങളാണ്​ ഇയാൾ പ്രചരിപ്പിച്ചിരിക്കുന്നത്​.

ഹഥ്​രസിലെ അതിക്രൂരമായ സംഭവത്തോട്​ ശക്തമായി പ്രതികരിച്ച കോൺഗ്രസ് നേതൃത്വത്തെ പരിഹസിച്ച നിർമൽ കുമാർ 'ഇറ്റാലിയൻ മാഫിയ' രാജ്യത്തെ പാവങ്ങളെ ഉപയോഗിച്ച്​ വിലകെട്ട രാഷ്​ട്രീയം കളിക്കുകയാണെന്നും ആരോപിച്ചു. രാജ്യത്തെ കോടിക്കണക്കിന് ആളുകൾ കടുത്ത ദുഃഖത്തിലാണെന്നും ഹഥ്​രസിലെ മകൾക്ക് അനുഭവിക്കേണ്ടിവന്ന അതിക്രൂരമായ ആക്രമണം നമ്മുടെ സമൂഹത്തെ കളങ്കപ്പെടുത്തുന്നതാണെന്നും വീഡിയോ പ്രസ്താവനയിൽ സോണിയ ഗാന്ധി പറഞ്ഞിരുന്നു.

ലൈംഗിക കുറ്റകൃത്യങ്ങൾക്ക് ഇരയായവരുടെ വ്യക്തിവിവരങ്ങളോ ചിത്രങ്ങളോ അവരെ തിരിച്ചറിയാവുന്ന തരത്തിലുളള വിവരങ്ങളോ പേരുകളോ പ്രസിദ്ധീകരിക്കാനോ സംപ്രേഷണം ചെയ്യാനോ പാടില്ലെന്ന സുപ്രീംകോടതി മാർഗനിർദേശങ്ങളാണ്​ ഐ.ടി സെൽ കൺവീനറായ നിർമൽ കുമാർ ലംഘിച്ചിരിക്കുന്നത്​. നിർമലി​െനതിരെ വിമർശനങ്ങൾ ഉയരുന്നുണ്ടെങ്കിലും ഒരു തരത്തിലുള്ള നടപടിയും സ്വീകരിച്ചിട്ടില്ല.

അതേസമയം, പെൺകുട്ടിയുടെ മൃതദേഹം ബന്ധുക്കളെ ​പോലും കാണിക്കാതെ രാത്രി തന്നെ സംസ്​കരിച്ച പൊലീസ്​ നടപടിയിൽ പ്രതിഷേധം കനക്കുകയാണ്​. ഹഥ്​രസ്​ ജില്ലയിൽ കലക്​ടർ നിരോധനാജ്ഞ പ്രഖ്യാപിച്ചിട്ടുണ്ട്​.