ഭവാനിപൂരിൽ മമതയെ നേരിടാൻ ബി.ജെ.പിയുടെ പ്രിയങ്ക​​​? ബി.ജെ.പി സ്​ഥാനാർഥി പ്രഖ്യാപനം ഉടനെന്ന്​ സൂചന

കൊൽക്കത്ത: ബംഗാൾ നിയമസഭ ​ഉപതെരഞ്ഞെടുപ്പിൽ മുഖ്യമന്ത്രി മമത ബാനർജിക്കെതിരെ ബി.ജെ.പിയുടെ അഡ്വ. പ്രിയങ്ക തി​േബ്രവാൾ മത്സരത്തിനെത്തുമെന്ന്​ സൂചന. 2011 മുതൽ മമത ബാനർജിയെ നിയമസഭയിലെത്തിച്ച ഭവാനിപൂർ മണ്ഡലത്തിലാണ്​ ബി.ജെ.പിയുടെയ​ുടെ അഭിമാനപോരാട്ടം.

ബബുൾ സുപ്രിയോയുടെ ലീഗൽ അഡ്വൈസറായിരുന്നു​ പ്രിയങ്ക. 2014ലാണ്​ ഇവർ ബി.ജെ.പിയിലെത്തുന്നത്​. പ്രധാനമന്ത്രി നരേന്ദ്രമോദിയാണ്​ ബി.ജെ.പിയിൽ ചേരാൻ തനിക്ക്​ പ്രചോദനമായതെന്ന്​ പ്രിയങ്ക നേരത്തേ വ്യക്തമാക്കിയിരുന്നു.

​2015ൽ ബി.ജെ.പി സ്​ഥാനാർഥിയായി കൊൽക്കത്ത മുനിസിപ്പൽ കൗൺസലിലേക്ക്​ മത്സരിച്ചിരുന്നു. എന്നാൽ തൃണമൂൽ കോൺ​ഗ്രസിന്‍റെ സ്വപൻ സമ്മാദാറിനോട്​ പരാജയ​പ്പെടുകയായിരുന്നു. തുടർന്ന്​ ബി.ജെ.പിയുടെ നിരവധി നേതൃ സ്​ഥാനങ്ങളുടെ ചുമതല ഇവർ വഹിച്ചു. 2020ആഗസ്റ്റിൽ ഭാരതീയ ജനത യുവ മോർച്ചയുടെ ബംഗാൾ വൈസ്​ പ്രസിഡന്‍റായി ചുമതല​യേൽക്കുകയും ചെയ്​തിരുന്നു.

ഏപ്രിൽ-മേയ്​ മാസങ്ങളിലായി നടന്ന നിയമസഭ തെരഞ്ഞെടുപ്പിൽ എന്‍റലിയിൽനിന്ന്​ പ്രിയങ്ക ജനവിധി തേടിയിരുന്നു. എന്നാൽ തൃണമൂലിന്‍റെ സ്വർണ കമൽ സാഹയോട്​ പരാജയപ്പെടുകയായിരുന്നു ഇവർ. 58,257 വോട്ടിനായിരുന്നു പരാജയ​ം.

'ഭവാനിപൂരിലെ സ്​ഥാനാർഥിത്വവുമായി ബന്ധപ്പെട്ട്​ പാർട്ടി തന്നെ സമീപിച്ചിരുന്നു. മത്സരത്തിൽ നിരവധി പേരുകൾ ഉയർന്നുകേൾക്കുന്നുണ്ട്​. ആരായിരിക്കും സ്ഥാനാർഥിയെന്ന കാര്യം വ്യക്തമല്ല. ഇത്രയും വർഷം എന്നെ പിന്തുണച്ച എല്ലാ മുതിർന്ന നേതാക്കൾക്കും നന്ദി രേഖപ്പെടുത്തുന്നു' -പ്രിയങ്ക പ്രതികരിച്ചു.