ധനഞ്​ജയ്​ മുണ്ഡെക്കെതിരെ പരാതി നൽകിയതിന്​ കൊലപാതക​ ഭീഷണിയെന്ന്​ ബി.ജെ.പി നേതാവ്​

മുംബൈ: ലൈംഗിക ആരോപണ വിധേയനായ മഹാരാഷ്​ട്ര മന്ത്രി ധനഞ്​ജയ്​ മുണ്ഡെക്കെതിരെ സംസാരിച്ചതിന്​ എൻ.സി.പി നേതാക്കളിൽനിന്ന്​ ഭീഷണി സന്ദേശം ലഭിച്ചതായി ബി.ജെ.പി നേതാവും മുൻ എം.പിയുമായ ​കിരിത്​ സോമയ്യ.

ആറു എൻ.സി.പി നേതാക്കളിൽനിന്ന്​ തനിക്ക്​ ഭീഷണി സന്ദേശം ലഭിച്ചു. മഹാരാഷ്​ട്ര മന്ത്രി ധനഞ്​ജയ്​ മുണ്ഡെക്കെതിരെ സംസാരിച്ചാൽ വെടിയുതിർക്കുമെന്നായിരുന്നു ഭീഷണി. ഇത്തരം ഭീഷണികളിൽ ഭയപ്പെടില്ല. ധനഞ്​ജയ്​ മുണ്ഡെ രാജിവെക്കണം -കിരിത്​ സോമയ്യ ട്വീറ്റ്​ ചെയ്​തു.

തെരഞ്ഞെടുപ്പ്​ സത്യവാങ്​മൂലത്തിൽ വിവാഹേതര ബന്ധത്തിൽ മകളും മകനുമുള്ള കാര്യവും സ്വത്തുവിവരവും മറച്ചുവെച്ചുവെന്ന്​ ചൂണ്ടിക്കാട്ടി തെരഞ്ഞെടുപ്പ്​ കമീഷന്​ കിരിത്​ സോമയ്യ പരാതി നൽകിയിരുന്നു.

ഒരാഴ്ചമുമ്പ്​ സാമൂഹിക നീതി വകുപ്പ്​ മന്ത്രിയായ ധനഞ്​ജയ്​ മുണ്ഡെ ബലാത്സംഗം ചെയ്​തുവെന്നും മുംബൈ പൊലീസ്​ പരാതി സ്വീകരിക്കാൻ തയാറായില്ലെന്നും 37കാരിയായ ഗായിക വെളി​െപ്പടുത്തിയതിന്​ പിന്നാലെയായിരുന്നു കിരിതിന്‍റെ പരാതി​.

അതേസമയം ആരോപണങ്ങൾ നിഷേധിച്ച മുണ്ഡെ പരാതി നൽകിയ ഗായികയുമായി തനിക്ക്​ ബന്ധമില്ലെന്നും അവരുടെ സഹോദരിയുമായി വിവാഹേതര ബന്ധമുണ്ടെന്നും അതിൽ കുട്ടിക​ളുണ്ടെന്നും വ്യക്തമാക്കുകയായിരുന്നു.