ബംഗ്ലാദേശിൽ നിന്നും അനധികൃതമായെത്തിയതിന്​​ അറസ്റ്റിലായയാൾ ബി.ജെ.പി നേതാവായി, സംഘ്​ ജിഹാ​ദാണോയെന്ന്​ കോൺഗ്രസ്​

മുംബൈ: ഈ മാസമാദ്യം ബംഗ്ലാദേശിൽ നിന്നും അനധികൃതമായി കുടിയേറിയതിന്​ അറസ്റ്റിലായയാൾ ബി.ജെ.പിയുടെ പ്രാദേശിക നേതാവായി. തൊട്ടുപിന്നാലെ ബി.ജെ.പിയെ രൂക്ഷമായി പരിഹസിച്ച്​ കോൺഗ്രസ്​ രംഗ​ത്തെത്തി.

പുതിയ പൗരത്വ നിയമത്തിൽ ( സി.എ.എ ) ബി.ജെ.പി പ്രവർത്തകർക്ക്​ എന്തെങ്കിലും പ്രത്യേക പരിഗണനയുണ്ടോയെന്നും ഇത്​ സംഘ്​ ജിഹാദാണോയെന്നും​ കോൺഗ്രസ്​ വക്താവ്​ സചിൻ സാവന്ത്​ ട്വീറ്റ്​ ചെയ്​തു.

ഈ മാസമാദ്യം പൊലീസ്​ അറസറ്റ്​ ചെയ്​ത റുബെൽ ഷെയ്​ഖാണ്​ ബി.ജെ.പി നേതാവായി പരിണമിച്ചത്​. ബി.ജെ.പി എം.പി ഗോപാല ഷെട്ടിയോടൊപ്പമുള്ള റുബെലിന്‍റെ ചിത്രം പുറത്തുവന്നിരുന്നു. വടക്കൻ മുംബൈയിലെ ന്യൂനപക്ഷ സെൽ തലവനായാണ്​ റുബെലിനെ ബി.ജെ.പി നിയമിച്ചിരിക്കുന്നത്​. എന്നാൽ സംഭവം വിവാദമായതോടെ അറിയാതെ സംഭവിച്ചതാണെന്ന വിശദീകരണവുമായി ബി.ജെ.പി രംഗത്തെത്തിയിട്ടുണ്ട്​.

സംഭവത്തിൽ മഹാരാഷ്​ട്ര ആഭ്യന്തരമന്ത്രി അനിൽ ദേശ്​മുഖ്​ അന്വേഷണത്തിന്​ ഉത്തരവിട്ടു. പുതിയ പൗരത്വ നിയമപ്രകാരം ബംഗ്ലദേശ്​, പാകിസ്​താൻ, അഫ്​ഗാനിസ്​താൻ എന്നിവിടങ്ങളിൽ നിന്നും വന്ന മുസ്​ലിംകൾക്ക്​ പൗരത്വം ലഭിക്കില്ല.