മേധ പട്കറെ ചീത്തവിളിച്ച് പാർല​മെന്ററി സമിതിയിൽ ബി.ജെ.പിയുടെ ഇറങ്ങിപ്പോക്ക്

ന്യൂഡൽഹി: പ്രമുഖ ആക്ടിവിസ്റ്റ് മേധ പട്കറെ ക്ഷണിച്ചതിൽ പ്രതിഷേധിച്ച് ഭൂമി ഏറ്റെടുക്കൽ നിയമം പരിശോധിക്കുന്ന പാർലമെന്ററി സ്ഥിരം സമിതിയിലെ ബി.ജെ.പി അംഗങ്ങൾ ഇറങ്ങിപ്പോയി. മേധാ പട്കറെ ‘‘ദേശവിരുദ്ധ, വികസന വിരോധി’’ എന്നൊക്കെ ചീത്ത വിളിച്ച​ാക്ഷേപിച്ചായിരുന്നു പാർല​​മെന്റ് അനക്സിൽ ബി.ജെ.പി എം.പിമാരുടെ ഇറങ്ങിപ്പോക്ക്.

കോൺഗ്രസ് എം.പി സപ്തഗിരി ഉലക നയിക്കുന്ന ഗ്രാമ വികസന പഞ്ചായത്തീരാജ് സ്ഥിരം സമിതിക്ക് മുമ്പാകെ അഭി​പ്രായം അറിയിക്കാൻ എത്തിയ മേധ പട്കർ മുറിക്ക് പുറത്ത് തന്റെ ഉൗഴം കാത്തുനിൽക്കുന്നതിനിടയിലായിരുന്നു പ്രതിഷേധം. 2013ലെ ഭൂമി ഏറ്റെടുക്കൽ നിയമം ഫലപ്രദമായി നടപ്പാക്കുന്നതുമായി ബന്ധപ്പെട്ടായിരുന്നു സമിതിയുടെ പരി​ശോധന.

യോഗം ത​ുടങ്ങുന്നതിന് മുമ്പേ ബി.​ജെ.പി എം.പിമാർ കൂട്ടത്തോടെ മേധ പട്കറെ ചീത്തവിളിക്കാൻ തുടങ്ങി. വിവിധ സംസ്ഥാനങ്ങളിൽ വികസനം സ്തംഭിപ്പിച്ചവരാണ് മേധയെന്ന് കുറ്റ​പ്പെടുത്തിയ ബി.ജെ.പി എം.പിമാർ, ഇക്കണക്കിന് പോയാൽ പാകിസ്താൻ പ്രധാനമന്ത്രിയെയും അഭിപ്രായമറിയാൻ സമിതി ക്ഷണിക്കുമെന്ന് വിളിച്ചുപറയുന്നുണ്ടായിരുന്നു.

മേധ പട്കറിനെ കൂടാതെ നടൻ പ്രകാശ് രാജ്, അഭിഭാഷക ആരാധന ഭാർഗവ, മറ്റ് വിദഗ്ധർ, എൻ.ജി.ഒ പ്രതിനിധികൾ, വിഷയവുമായി ബ ന്ധപ്പെട്ട മറ്റു കക്ഷികൾ തുടങ്ങിയവരും സമിതി മുമ്പാകെ തങ്ങളുടെ അഭിപ്രായം അറിയിക്കാൻ എത്തിയിരുന്നു.