​മോദിയുടെ നേട്ടങ്ങൾ വിവരിച്ച്​ ബി.ജെ.പി പുറത്തിറക്കിയ വിഡിയോയിൽ അമേരിക്കൻ നഗരം ലോസ്​ ആഞ്ചലെസും VIDEO

ന്യൂഡൽഹി: പ്രധാനമന്ത്രി നരേന്ദ്രമോദിയുടെ ജന്മദിനത്തിൽ ബി.ജെ.പി പുറത്തിറക്കിയ വിഡിയോ വിവാദത്തിൽ. മോദിയുടെ നേട്ടങ്ങൾ വിവരിച്ചുകൊണ്ടുള്ള വിഡിയോയിൽ അമേരിക്കൻ നഗരം ലോസ്​ ആഞ്ചലെസിന്‍റെ ദൃശ്യങ്ങൾ ഉൾപ്പെട്ടത്​ സോഷ്യൽ മീഡിയ കൈയ്യോടെ പിടിച്ചു.

​ബി.​ജെ.പിയുടെ ഔദ്യോഗിക ട്വിറ്റർ ഹാൻഡിലിൽ നിന്നും പങ്കുവെച്ച വിഡിയോയിലാണ്​ 'അബദ്ധം' കയറിക്കൂടിയത്​. രണ്ട്​ മിനിറ്റ്​ 42 സെക്കന്‍റ്​ ദൈർഘ്യമുള്ള വിഡിയോയിൽ 2 മിനിറ്റ്​ 23സെക്കൻഡിലാണ്​ ലോസ്​ ആഞ്ചലെസ്​ നഗരത്തിന്‍റെ ചിത്രം ഇടം പിടിച്ചത്​. ബ്രിട്ടീഷ്​ സ്​റ്റോക്​ ഫോ​േട്ടാ ഏജൻസിയായ അലാമിക്കായി പകർത്തിയ ചിത്രമാണിത്​.

പ്രസ്​തുത ദൃശ്യങ്ങൾ മറ്റുവിഡിയോകളിലും വ്യാപകമായി ഉപയോഗിച്ചിട്ടുണ്ട്​. വിഡിയോയിലെ തെറ്റ്​ പലരും ചൂണ്ടിക്കാട്ടിയെങ്കിലും ബി.ജെ.പി വിഡിയോ പിൻവലിച്ചിട്ടില്ല. വിഡിയോയിൽ മോദിയെ വലിയ പരിഷ്​കർത്താവും ഇന്ത്യയുടെ സാമ്പത്തിക രംഗത്തെ വികസിപ്പിച്ച വ്യക്തിയുമായാണ്​ അവതരിപ്പിക്കുന്നത്​.

അടുത്തിടെ യു.പി സർക്കാറിന്‍റെ വികസന സപ്ലിമെന്‍റിൽ ബംഗാളിലെ മേൽപ്പാലത്തിന്‍റെ ചിത്രം ഉൾപ്പെട്ട സംഭവം ഏറെ വിവാദമായിരുന്നു. ഒടുവിൽ തെറ്റുപറ്റിയത് തങ്ങൾക്കാണെന്ന് സമ്മതിച്ച്​ ഇന്ത്യൻ എക്സ്പ്രസ് രംഗത്തെത്തിയതോടെയാണ്​ വിവാദം ഒരുവിധം കെട്ടടങ്ങിയത്​ . പത്രത്തിന്‍റെ വാരാന്ത്യപതിപ്പായ സൺഡേ എക്സ്പ്രസിലാണ് യു.പി സർക്കാറിന്‍റെ മൂന്ന് പേജ് മുഴുനീള പരസ്യം പ്രസിദ്ധീകരിച്ചത്.