മോദിയുടെ ആറുമണി വീഡിയോക്ക്​ ഡിസ്​ലൈക്ക്​ പെരുമഴ​; ബട്ടൻ ഒാഫ്​ ചെയ്​ത്​ ബിജെ.പി

ചൊവ്വാഴ്ച വൈകീട്ട് ആറിന് പ്രധാനമന്ത്രി നരേന്ദ്ര മോദി നടത്തിയ പ്രസംഗത്തിന്​ യൂ ട്യൂബിൽ ഡിസ്​ലൈക്ക്​ പെരുമഴ​. ക്രമാതീതമായി ഡിസ്​ലൈക്ക്​ വർധിച്ചതോടെ ബട്ടൻ ഒാഫ്​ ചെയ്​ത്​ ബി.ജെ.പി. രാജ്യത്ത്​ വരാനിക്കുന്ന ഉത്സവകാലത്ത്​ കോവിഡിനെതിരായ ജാഗ്രത കൈവിടരുതെന്ന മുന്നറിയിപ്പുമായിട്ടായിരുന്നു മോദിയുടെ പ്രഭാഷണം. ലോക്​ഡൗൺ അവസാനിച്ചു എന്നാൽ കോറോണ അവസാനിച്ചിട്ടില്ലെന്ന്​ രാജ്യം എപ്പോഴും ഓർമിക്കണമെന്നും​ അദ്ദേഹം പറഞ്ഞു. ബി.ജെ.പി ഔദ്യോഗിക യൂട്യൂബ് ചാനലില്‍ പങ്കുവെച്ച വീഡിയോയ്ക്കാണ് ആയിരക്കണക്കിന് ഡിസ്‌ലൈക്ക് ലഭിച്ചത്. ലൈക്കുകളെ മറികടന്ന് ഡിസ്​ലൈക്ക്​ കുതിച്ചതോടെ ഗത്യന്തരമില്ലാതെ ബട്ടൻ ഒഴിവാക്കുകയായിരുന്നു.

നിരവധി ഭാഗങ്ങളായി യൂ ട്യൂബിൽ പ്രത്യക്ഷ​െപ്പട്ട എല്ലാ വീഡിയോകൾക്കും ലൈക്കുകളേക്കാൾ കൂടുതൽ ഡിസ്​ലൈക്ക്​ ആണ്​ ലഭിച്ചത്​. ബട്ടൻ ഒഴിവാക്കിയതോടെ പ്രതിഷേധം കമൻറ്​ ബോക്​സിലായി. ഞങ്ങൾക്ക്​ ഞങ്ങളുടെ ഡിസ്​ലൈക്ക്​ ബട്ടൻ തിരിച്ചുതരൂ എന്നായിരുന്നു നെറ്റിസൺസ്​ കമൻറിൽ ആവശ്യ​െപ്പട്ടത്​. ധാരാളംപേർ കമൻറിൽ ഡിസ്​ലൈക്കും രേഖപ്പെടുത്തി. 'എന്തിനാണ്​ ഇത്രയും വിഡ്ഡിത്തങ്ങൾ പറയുന്നത്​'എന്നാണ് ചിലർ ചോദിച്ചത്​. ​ദാരിദ്ര്യത്തിലെ വർധനവിനെപറ്റിയും ജി.ഡി.പിയിലെ തകർ​ച്ചയെപറ്റിയുമാണ്​ ചിലർക്ക്​ ചോദിക്കാനുണ്ടായിരുന്നത്​.

രണ്ട്​ മാസങ്ങൾക്ക്​ മുമ്പ്​ മോദിയുടെ മൻ കി ബാത്​ പ്രഭാഷണത്തിനും ലക്ഷക്കണക്കിന്​ ഡിസ്​ലൈക്കുകൾ ലഭിച്ചിരുന്നു. മറ്റ്​ രാജ്യങ്ങളുമായി താരതമ്യം ചെയ്യു​േമ്പാൾ കോവിഡിൽ ഇന്ത്യ മെച്ചപ്പെട്ട അവസ്ഥയിലാണെന്ന്​ പ്രധാനമന്ത്രി പ്രസംഗത്തിൽ പറഞ്ഞു​. കോവിഡ്​ പ്രതിരോധം നമ്മളൊരിക്കലും കൈവിടരുതെന്നും അദ്ദേഹം വ്യക്​തമാക്കി. ലോക്​ഡൗൺ പ്രഖ്യാപിച്ചതിന്​ ശേഷം ഇത്​ ഏഴാം തവണയാണ്​ മോദി രാജ്യത്തെ അഭിസംബോധന ചെയ്യുന്നത്​.