രാമക്ഷേത്ര ഉദ്ഘാടനം; ക്ഷണം നിരസിച്ചതിൽ കോൺ​ഗ്രസ് ഖേദിക്കുമെന്ന് ബി.ജെ.പി

ന്യൂഡൽഹി: രാമക്ഷേത്ര പ്രതിഷ്ഠാ ചടങ്ങിൽ പങ്കെടുക്കുന്നില്ലെന്ന് വ്യക്തമാക്കിയതിന് പിന്നാലെ കോൺ​ഗ്രസിനെതിരെ വിമർശനവുമായി ബി.ജെ.പി. തീരുമാനത്തിൽ കോൺ​ഗ്രസ് ഖേദിക്കുമെന്നും കോൺ​ഗ്രസ് പാർട്ടി സോണിയ ​ഗാന്ധിയുടെയും മല്ലികാർജുൻ ഖാർ​ഗെയുടേയും വാക്ചാതുര്യത്തിൽ കുടുങ്ങിക്കിടക്കുകയാണെന്നുമായിരുന്നു ബി.ജെ.പി നേതാവും കേന്ദ്ര മന്ത്രിയുമായ ഹർദീപ് സിങ് പുരിയുടെ പരാമർശം.

ശ്രീരാമന്റെ അസ്ഥിത്വത്തിൽ തന്നെ സംശയം പ്രകടിപ്പിച്ച കോൺ​ഗ്രസ് രാമക്ഷേത്ര പ്രതിഷ്ഠാ ചടങ്ങിന്റെ ക്ഷണം നിരസിച്ചതിൽ ആശ്ചര്യപ്പെടാനില്ലെന്ന് ബി.ജെ.പി നേതാവ് നളിൻ കോഹ്ലി പ്രതികരിച്ചു. അയോധ്യയിൽ ക്ഷേത്രത്തിനായി കോൺ​ഗ്രസ് ഭരിച്ചിരുന്ന കാലത്ത് ഒരു നീക്കവും നടന്നിട്ടില്ലെന്നും അവർ ശ്രീരാമൻ്റെ അസ്ഥിത്വത്തെ ചോദ്യം ചെയ്യുകയും സുപ്രീം കോടതി വിധിയെയും ചോദ്യം ചെയ്യുകയാണുണ്ടായതെന്നും അദ്ദേഹം പറഞ്ഞു.കോൺ​ഗ്രസ് ചടങ്ങിൽ പങ്കെടുക്കാത്തത് പാർട്ടിയുടെ നയമാകാമെന്നതിനാൽ പരാതിയില്ലെന്നും എന്നാൽ ചടങ്ങിനെ ബി.ജെ.പി പരിപാടി എന്ന് മുദ്രകുത്തിയത് അം​ഗീകരിക്കാനാകില്ലെന്നും മജീന്ദർ സിങ് മിർസ പറഞ്ഞു.

ബി.ജെ.പിയുടെയും ആർ.എസ്.എസിന്റെയും രാഷ്ട്രീയ പദ്ധതിയാണിതെന്ന് ആരോപിച്ചാണ് കോൺഗ്രസ് ചടങ്ങ് ബഹിഷ്‍കരിക്കുന്നത്. ആർ.എസ്.എസും ബി.ജെ.പിയും അയോധ്യയെ രാഷ്ട്രീയ പ്രചാരണായുധമാക്കി മാറ്റിയെന്നും കോൺഗ്രസ് ആരോപിച്ചു. രാമ​ക്ഷേത്ര പ്രതിഷ്ഠ ചടങ്ങിൽ പ​ങ്കെടുക്കാൻ കോൺഗ്രസ് നേതാക്കളായ മല്ലികാർജുൻ ഖാർഗെ, സോണിയ ഗാന്ധി, ലോക്സഭ നേതാവ് അധിർ രഞ്ജൻ ചൗധരി എന്നിവർക്കാണ് ക്ഷണം ലഭിച്ചത്.