സിന്ധ്യക്കെതിരെ മധ്യപ്ര​േദശ്​ ബി.ജെ.പിയിൽ പടയൊരുക്കം

ഭോപ്പാൽ: കോൺഗ്രസ്​ വി​ട്ടെത്തിയ ജ്യോതിരാദിത്യ സിന്ധ്യക്കും അനുയായികൾക്കുമെതിരെ പടയൊരുക്കവുമായി മധ്യപ്രദേശിലെ ഒരുകൂട്ടം ബി.ജെ.പി നേതാക്കൾ. സിന്ധ്യയും കൂട്ടരും വന്നതോടെ തങ്ങളുടെ നില പരുങ്ങലിലാവുമെന്ന ഭീതിയാണ്​ മുൻ കോൺഗ്രസ്​ നേതാവിനെതിരെ തിരിയാൻ ഇവരെ പ്രേരിപ്പിക്കുന്നത്​. 'കുടിയൊഴിപ്പിക്കപ്പെട്ട കശ്​മീരി പണ്ഡിറ്റുകളുടെ അവസ്​ഥയിലാണിപ്പോൾ​ ഞങ്ങൾ​' എന്നാണ്​ ഇവരുടെ പരിഭവം. സിന്ധ്യയുടെ തട്ടകമായ ഗ്വാളിയോറിൽനിന്നുള്ള നേതാക്കളാണ്​ ഈ പടയൊരുക്കത്തിന്​ ചുക്കാൻ പിടിക്കുന്നത്​.

മധ്യപ്രദേശിൽ 24 മണ്ഡലങ്ങളിലേക്ക്​ ഉപതെരഞ്ഞെടുപ്പ്​ നടക്കാനിരിക്കെയാണ്​ ജ്യോതിരാദിത്യക്കെതിരെ പാളയത്തിൽ പട രൂപം കൊള്ളുന്നത്​. സിന്ധ്യക്കൊപ്പം കോൺഗ്രസ്​ വിട്ട്​ ബി.ജെ.പിയിൽ ചേക്കേറിയ 22 എം.എൽ.എമാരും മത്സരിക്കാനൊരുങ്ങൂകയാണ്​. തെരഞ്ഞെടുപ്പ്​ തീയതി ഇതുവരെ പ്രഖ്യാപിച്ചിട്ടില്ല. പാർട്ടി മാറിയെത്തിയ സിന്ധ്യക്ക്​ കരുത്ത്​ തെളിയിക്കാനും ബി.ജെ.പിയിൽ മേൽക്കൈ നേടാനും ഉപതെരഞ്ഞെടുപ്പിലെ ജയം അനിവാര്യമാണ്​. എന്തെങ്കിലും തിരിച്ചടിയുണ്ടായാൽ സംഘ്​ പരിവാർ പാളയത്തിലെ സിന്ധ്യയുടെ സ്വീകാര്യതക്കും സാധ്യതകൾക്കും അതു വലിയ പ്രതിബന്ധമാകും.

ഇതു മനസ്സിലാക്കി, ഇന്ദോറിലും ഗ്വാളിയോറിലുമൊക്കെ കഴിഞ്ഞ മാസംതന്നെ സിന്ധ്യ സന്ദർശനത്തിനെത്തിയിരുന്നു. ഇന്ദോറിലെ ബി.ജെ.പി നേതാക്കളെ സന്ദർശിച്ച്​ അവരുടെ പിന്തുണയാർജിക്കാനുള്ള ശ്രമങ്ങളിൽ മുന്നോട്ടുപോകാൻ കഴിഞ്ഞെങ്കിലും ഗ്വാളിയോറിൽ സ്​ഥിതി മറിച്ചാണ്​. ഇത്രയും കാലം സിന്ധ്യയെ പല്ലും നഖവുമുപയോഗിച്ച്​ എതിർത്തുവന്ന ഗ്വാളിയോറിലെ ബി.ജെ.പി നേതാക്കൾക്ക്​ ഇ​തുവരെ അദ്ദേഹത്തി​െൻറ പാർട്ടിപ്രവേശം ദഹിച്ചിട്ടില്ല. തങ്ങളുടെ അവസരം മുടക്കാൻ വന്നവനെന്ന ഈർഷ്യയുമായി ഗ്വാളിയോറിലെ നേതാക്കൾ എതിർപ്പ്​ തുടരു​േമ്പാൾ മേഖലയിൽ ഉപതെരഞ്ഞെടുപ്പിൽ തിരിച്ചടിയേൽക്കുമോ എന്ന ആശങ്കയും ബി.ജെ.പി ദേശീയ നേതൃത്വത്തിനുണ്ട്​. പ്രഭാത്​ ഝാ, ഗൗരി ശങ്കർ ഷെജ്​വാർ, മായാ സിങ്​ എന്നിവരടക്കമുള്ള നേതാക്കളെ തൽക്കാലം നേതൃത്വം ഒതുക്കി നിർത്തിയിട്ടുണ്ടെങ്കിലും ഇവരുടെ ഉള്ളിലിരിപ്പ്​ വ്യക്​തമല്ല.

ജന്മദേശമായ ഗ്വാളിയോറിൽ കേന്ദ്ര കൃഷി മന്ത്രി നരേന്ദ്ര സിങ്​ തൊമാറിനൊപ്പമാണ്​ ജ്യോതിരാദിത്യ കഴിഞ്ഞ ആഴ്​ച സന്ദർശനത്തിനെത്തിയത്​. തൊമാറും ഗ്വാളിയോർ സ്വദേശിയാണ്​. മേഖലയിലെ ബി.ജെ.പി നേതാക്കളെ അനുനയിപ്പിക്കുകയായിരുന്നു സിന്ധ്യയുടെ ഉദ്ദേശ്യം. ഗ്വാളിയോർ-ചമ്പൽ മേഖലയിലെ 24ൽ 16 സീറ്റിലും സിന്ധ്യക്ക്​ വ്യക്​തമായ സ്വാധീനമുണ്ട്​.

എന്നാൽ, സിന്ധ്യ ഗ്വാളിയോറിൽ സന്ദർശനത്തിനെത്തിയ ദിവസം മേഖലയിലെ പ്രധാന ബി.ജെ.പി നേതാവ്​ ജയ്​ഭൻ സിങ്​ പവയ്യയുടെ മുനവെച്ച ഒരു ട്വീറ്റുണ്ടായിരുന്നു. കോൺഗ്രസ്​ സ്​ഥാനാർഥികളായി മുമ്പ്​ പാർലമെൻറിലേക്ക്​ മത്സരിച്ച ജ്യോതിരാദിത്യക്കും അദ്ദേഹത്തി​െൻറ പിതാവ്​ മാധവറാവു സിന്ധ്യക്കുമെതിരെ ബി.ജെ.പി ടിക്കറ്റിൽ കളത്തിലിറങ്ങിയയാളാണ്​ ജയ്​ഭൻ. 'പാമ്പുകൾക്ക്​ രണ്ടു നാവുള്ളപ്പോൾ മനുഷ്യന്​ ഒരു നാവേയുള്ളൂ. ഭാഗ്യവശാൽ നമ്മളെല്ലാം മനുഷ്യരാണ്​. രാഷ്​ട്രീയത്തിൽ, കാലത്തിനനുസരിച്ച്​ നമ്മൾക്ക്​ സുഹൃത്തുക്കളെയും ശത്രുക്കളെയുമൊക്കെ മാറ്റിക്കൊണ്ടിരിക്കാം. എന്നാൽ, എന്നെ സംബന്ധിച്ചിടത്തോളം ഇക്കാലത്തും അടിസ്​ഥാന തത്വങ്ങളാണ്​ കൂടുതൽ പ്രധാനം.' -ഇതായിരുന്നു പവയ്യയുടെ ട്വീറ്റ്​. ഉപതെരഞ്ഞെടുപ്പിൽ 22 സ്​ഥാനാർഥികളുടെ വിജയത്തിനായി ബി.ജെ.പി നിശ്ചയിച്ച തെരഞ്ഞെടുപ്പ്​ പ്രചാരണ സമിതിയിൽ അംഗമാണ്​ പവയ്യ. എന്നാൽ, ഇദ്ദേഹം പ്രചാരണ രംഗത്ത്​ ഒട്ട​ും സജീവമല്ലെന്ന്​ സംസ്​ഥാന ഘടകത്തിലെ ചിലർ വെളിപ്പെടുത്തിയതായി 'ദ പ്രിൻറ്​' റിപ്പോർട്ടു ചെയ്​തു.

സിന്ധ്യയുടെ വിശ്വസ്​തനായ പ്രധ്യുമാൻ സിങ്​ തൊമാറിനുവേണ്ടി പവയ്യ പ്രചാരണത്തിനിറങ്ങേണ്ടതായിരുന്നു. ഇതുവരെ അദ്ദേഹം തൊമാറി​നുവേണ്ടി രംഗത്തിറങ്ങിയിട്ടില്ല. 2018ലെ നിയമസഭ തെരഞ്ഞെടുപ്പിൽ കോൺഗ്രസ്​ സ്​ഥാനാർഥിയായിരുന്ന തൊമാർ പരാജയപ്പെടുത്തിയത്​ പവയ്യ​യെ ആയിരുന്നു. കൂറുമാറിയ തൊമാർ, ഇപ്പോൾ മധ്യപ്രദേശ്​ ബി.ജെ.പി സർക്കാറിൽ ഊർജമന്ത്രിയാണ്​. മുമ്പ്​ ശിവരാജ്​ സിങ്​ ചൗഹാൻ മന്ത്രിസഭയിൽ വിദ്യാഭ്യാസ മന്ത്രിയായിരുന്ന പവയ്യയെ അന്ന്​ തൊമാർ കളിയാക്കി വിളിച്ചിരുന്നത്​ 'മേക്കപ്പ്​ മിനിസ്​റ്റർ' എന്നായിരുന്നു. വേഷത്തിനൊത്ത ഷൂ മാറിമാറി ധരിക്കുന്നതുകൊണ്ടായിരുന്നു ആ പരിഹാസം. അതൊന്നും പവയ്യ എളുപ്പം മറക്കാനിടയില്ലെന്നാണ്​ അണിയറ സംസാരം.