മാസ്​കും സാമൂഹിക അകലവുമില്ല; പ്രവർത്തകർക്കൊപ്പം പിറന്നാളാഘോഷിച്ച്​ ബി.ജെ.പി എം.പി

ഭുവനേശ്വര്‍: കോവിഡ് മാനദണ്ഡങ്ങള്‍ ലംഘിച്ച് പുതുതായി തെരഞ്ഞെടുക്കപ്പെട്ട ബി.ജെ.പി ദേശീയ വക്താവും ഭുവനേശ്വര്‍ എം.പിയുമായ അപരാജിത സാരംഗിയുടെ ജന്‍മദിനാഘോഷം. പരിപാടിയിൽ പ​ങ്കെടുത്ത ഒരാൾ പോലും മാസ്​ക്​ ധരിച്ചിട്ടില്ല. പ്രവർത്തകർ സാമൂഹിക അകലം പാലിക്കാതെ കേക്ക്​ മുറിച്ച്​ കഴിക്കുന്നതി​െൻറയും അപരാജിതക്ക്​ ചുറ്റും നൃത്തം ചെയ്യുന്നതി​െൻറയും ദൃശ്യങ്ങള്‍ സാമൂഹിക മാധ്യമങ്ങളിൽ പ്രചരിക്കുകയാണ്​.

ബി.ജെ.പി എം.പിയുടെ ഉത്തരവാദിത്തമില്ലാത്ത പെരുമാറ്റത്തിന് എതിരെ ഒഡീഷ സര്‍ക്കാര്‍ രംഗത്തെത്തി. അപരാജിത തുടർച്ചയായി കോവിഡ് മാനദണ്ഡങ്ങള്‍ ലംഘിച്ചുവെന്ന് കേന്ദ്ര ആഭ്യന്തര സഹമന്ത്രിക്ക് അയച്ച കത്തില്‍ ഒഡീഷ ആഭ്യന്തര മന്ത്രി ഡി.എസ് മിശ്ര ആരോപിച്ചു. മാസ്​ക്​ ധരിക്കാതെയും സാമൂഹിക അകലം പാലിക്കാതെയും നൂറോളം സ്ത്രീകള്‍ അപരാജിത സാരംഗിക്ക് ചുറ്റും നില്‍ക്കുന്നതായി വീഡിയോയില്‍ ദൃശ്യമാണെന്ന് അദ്ദേഹം കത്തില്‍ ചൂണ്ടിക്കാട്ടി.

എന്നാല്‍ കോവിഡ് മാനദണ്ഡങ്ങള്‍ ലംഘിച്ചിട്ടില്ലെന്നും രോഗമില്ലാത്ത വളരെ കുറച്ച്​ പേർമാത്രമാണ്​ പരിപാടിക്കെത്തിയതെന്നുമാണ്​ എം.പിയുടെ അവകാശവാദം.

ഇതാദ്യമായല്ല എം.പി അപരാജിത കോവിഡ്​ മാനദണ്ഡങ്ങൾ ലംഘിക്കുന്നത്​. നേരത്തെ, സാമൂഹിക അകലം പാലിക്കാതെ പാര്‍ട്ടി പ്രവര്‍ത്തകരുമായി കൂടിക്കാഴ്ച നടത്തുന്ന ദൃശ്യങ്ങള്‍ സമൂഹ മാധ്യമങ്ങളില്‍ വൈറലായിരുന്നു. ലോക്ഡൗണ്‍ മാര്‍ഗനിര്‍ദേശങ്ങള്‍ ലംഘിച്ചതിന് ഇവര്‍ക്ക് പിഴയും ചുമത്തിയിരുന്നു. ജൂൺ ഒമ്പതിന്​ ഹൻസ്​പാലിൽ നടന്ന മറ്റൊരു ചടങ്ങിലും അപരാജിത സാംരഗി കോവിഡ്​ മാനദണ്ഡങ്ങൾ ലംഘിച്ചിരുന്നു.