രാമക്ഷേത്ര നിർമാണം മുടക്കിയാൽ ഹജ്ജ്​ തീർത്ഥാടകരെ തടയും–ബി.ജെ.പി എം.എൽ.എ

ലഖ്​നോ: അയോധ്യയിൽ രാമക്ഷേത്രം നിർമാണം തടഞ്ഞാൽ  മുസ്​ലിം വിശ്വാസികളെ ഹജ്ജ്​ തീർത്ഥാടനത്തിനും സമ്മതിക്കില്ലെന്ന്​ ബി.ജെ.പി എം.എൽ.എ ബ്രിജ്​ഭൂഷൺ രജ്​പുത്​. ‘‘രാമക്ഷേത്രം നിർമിക്കാൻ അനുമതിയില്ലെങ്കിൽ ഉത്തർ്പ്രദേശിലെ മുസ്​ലിംകളെ ഹജ്ജ്​ തീർത്ഥാടനത്തിനു പോകാനും ഹിന്ദുക്കൾ അനുവദിക്കരുത്​. ഹജ്ജിനു സർക്കാർ അനുവദിക്കുന്ന സബ്​സിഡിയും നിർത്തലാക്കണം’’– രജ്​പുത്​ ഫേസ്​ബുക്ക്​ വിഡിയോയിലൂടെ അഭിപ്രായപ്പെട്ടു. 

മുസ്​ലിംകൾക്ക്​ പാകിസ്​താൻ കിട്ടിയിട്ടും നിരവധിപേർ ഇവിടെ തന്നെ തങ്ങുകയാണ്​. ഭാരതം ഹിന്ദുക്കളുടേതാണ്​. ഭാരതത്തിലെ നൂറുകോടി ജനങ്ങൾ രാമക്ഷേത്രം നിർമിക്കുമെന്ന്​  പ്രതിജ്ഞയെടുക്കണം. അസദുദ്ദീൻ ഉവൈസിയെ പോലുള്ള രാജ്യദ്രോഹികളെ പാകിസ്​താനിലേക്ക്​ ​അയക്കണമെന്നും ബ്രിജ്​ഭൂഷൺ രജ്​പുത്​ പറഞ്ഞു.

ഉത്തർപ്രദേശിലെ ചക്രകാരിയിൽ നിന്നുള്ള ജനപ്രതിനിധിയാണ്​ ബ്രിജ്​ഭൂഷൺ. മതവിദ്വേഷമുണ്ടാക്കുന്ന വിഡിയോ സാമൂഹ്യമാധ്യമങ്ങളിൽ പ്രചരിപ്പിച്ച എം.എൽ.എക്കെതിരെ നടപടി വേണമെന്ന്​ പ്രതിപക്ഷ പാർട്ടികൾ ആവശ്യപ്പെട്ടിട്ടുണ്ട്​.