കോടതിയിൽ ഹാജരാകാതിരിക്കാൻ വ്യാജ കോവിഡ്​ സർട്ടിഫിക്കറ്റ്​; യു.പിയിൽ ബി.ജെ.പി എം.എൽ.എക്കെതിരെ കേസ്​

ലഖ്​നോ: കൊലപാതകശ്രമക്കേസിന്‍റെ വിചാരണക്ക്​ കോടതിയിൽ ഹാജരാകാതിരിക്കാൻ വ്യാജ കോവിഡ്​ സർട്ടിഫിക്കറ്റ്​ സമർപ്പിച്ച ബി.ജെ.പി എം.എൽ.എക്കെതിരെ പൊലീസ്​ കേസെടുത്തു. മെൻഹ്​ദാവൽ മണ്ഡലത്തിലെ എം.എൽ.എ രാകേഷ്​ സിങ്​ ബാഗെലിനെതിരെയാണ്​ കോട്​വാലി പൊലീസ്​ കേസെടുത്തത്​.

വ്യാജ സർട്ടിഫിക്കറ്റ്​ നൽകിയ സന്ത്​ കബീർ നഗർ ചീഫ്​ മെഡിക്കൽ ഓഫിസർ (സി.എം.ഒ) ഡോ. ഹർഗോവിന്ദ്​ സിങിനെതിരെയും കേസെടുത്തിട്ടുണ്ട്​. 2010ലെ ഒരു കൊലപാതകശ്രമവും​ പൊതുമുതൽ നശിപ്പിക്കലും സംബന്ധിച്ച കേസുകളുടെ വിചാരണക്ക്​ ഹാജരാകാൻ അഡീഷണൽ സെഷൻസ്​ ജഡ്​ജ്​ ദീപാന്ത്​ മണി രാകേഷ്​ സിങിന്​ നോട്ടീസ്​ അയച്ചിരുന്നു. കോടതിയിൽ ഹാജരാകാതിരിക്കാൻ കോവിഡ്​ ബാധിച്ചുവെന്ന വ്യാജ സർട്ടിഫിക്കറ്റ്​ രാകേഷ്​ നൽകുകയായിരുന്നു. ഒരു സ്വകാര്യലാബിൽ നടത്തിയ പരിശോധനയിൽ രാകേഷ്​ കോവിഡ്​ പോസിറ്റിവ്​ ആണെന്ന്​ തെളിഞ്ഞെന്നും അദ്ദേഹം ഹോം ഐസൊലേഷനിൽ ആണെന്നുമുള്ള സർട്ടിഫിക്കറ്റ്​ സി.എം.ഒ ഡോ. ഹർഗോവിന്ദ്​ സിങ്​ ആണ്​ കോടതിയിൽ സമർപ്പിച്ചത്​.

എന്നാൽ, ഹോം ഐസൊലേഷനിൽ കഴിയുന്നവരുടെ നിരീക്ഷണത്തിന്‍റെ ചുമതലയുള്ള ഡോ. വിവേക്​ കുമാർ ശ്രീവാസ്​തവ സർട്ടിഫിക്കറ്റിൽ പറയുന്ന കാലയളവിൽ രാകേഷ്​ വീട്ടിൽ ഉണ്ടായിരുന്നില്ലെന്നും അദ്ദേഹത്തെ ഫോണിൽ ബന്ധപ്പെടാൻ ശ്രമിച്ചിട്ട്​ ലഭിച്ചില്ലെന്നും കോടതിയിൽ റിപ്പോർട്ട്​ നൽകി. തുടർന്ന്​ കോടതി നിർദേശപ്രകാരം നടത്തിയ അന്വേഷണത്തിലാണ്​ ര​ാകേഷും സി.എം.ഒയും​ ചേർന്ന്​ വ്യാജ കോവിഡ്​ സർട്ടിഫിക്കറ്റ്​ നിർമിച്ചതായി കണ്ടെത്തിയത്​. 2017 ഉത്തർപ്രദേശ്​ നിയമസഭ തെരഞ്ഞെടുപ്പിലാണ്​ ഗോമതിനഗർ സ്വദേശിയായ രാകേഷ്​ സിങ്​ മെൻഹ്​ദാവൽ മണ്ഡലത്തിൽനിന്ന് ജയിച്ചത്​. ​