മിത്രോം... ഈ ഫോ​ട്ടോ​ സി.പി.എമ്മിന്‍റെ റാലിയാണ്​; മോദിയെ കാണാൻ വന്നവരല്ല

​കൊൽക്കത്ത: മറ്റു പാർട്ടികളിലെ എം.എൽ.എമാ​െരയും എം.പിമാരെയുമൊക്കെ അടിച്ചുമാറ്റുന്നതിൽ വിദഗ്​ധരാണ്​ തങ്ങളെന്ന്​ അമിത്​ ഷായുടെ പാർട്ടിയായ ബി.ജെ.പി പലവുരു തെളിയിച്ചതാണ്​. പോണ്ടിച്ചേരിയിലും ബംഗാളിലുമൊക്കെ ഇപ്പോഴും തകൃതിയായി ഈ ജനാധിപത്യ വിരുദ്ധ കലാപരിപാടി തുടരുന്നുമുണ്ട്​. എന്നാൽ, മറ്റൊരു പാർട്ടി സംഘടിപ്പിച്ച ഒരു മഹാ റാലി തന്നെ തട്ടിയെടുത്താലോ? ഇങ്ങനെയൊക്കെ നടക്കുമോ എന്ന്​ നെറ്റിചുളിക്കാൻ വര​ട്ടെ, അതും സംഭവിച്ചിരിക്കുന്നു.

പശ്ചിമ ബംഗാൾ നിയമസഭാ തെരഞ്ഞെടുപ്പിന് മുന്നോടിയായി കൊൽക്കത്ത ബ്രിഗേഡ് പരേഡ് ഗ്രൗണ്ടിൽ കഴിഞ്ഞയാഴ്ച സി.പി.എം നേതൃത്വത്തിൽ മഹാറാലി നടത്തിയിരുന്നു. കോൺഗ്രസ്​, ഇന്ത്യൻ സെക്കുലർ ഫ്രണ്ട് (ഐ.എസ്​.എഫ്)​ തുടങ്ങിയ സംഘടനകൾ അണിനിരന്ന റാലിയിൽ ലക്ഷക്കണക്കിന്​ പേരാണ്​ പ​ങ്കെടുത്തത്​. ഇതിന്‍റെ ചിത്രങ്ങളെന്ന പേരിൽ നിരവധി ഇടത്​, കോൺഗ്രസ് പ്രവർത്തകർ കഴിഞ്ഞയാഴ്ച മുതൽ ട്വിറ്ററിലും ഫേസ്​ബുക്കിലും ഫോ​ട്ടോകൾ പ്രചരിപ്പിക്കുന്നുണ്ട്​. എന്നാൽ, ഇതേ ചിത്രങ്ങൾ കൈയോടെ അടിച്ച്​ മാറ്റി തങ്ങളുടെതാക്കിയിരിക്കുകയാണ്​ ബി.ജെ.പിക്കാർ. ഇതേഗ്രൗണ്ടിൽ കഴിഞ്ഞ ദിവസം പ്രധാനമന്ത്രി മോദി നടത്തിയ റാലിയിൽ പ​ങ്കെടുത്തവർ എന്ന വ്യാജേനയാണ്​ സി.പി.എമ്മിന്‍റെ ഫോ​ട്ടോ സോഷ്യൽ മീഡിയയിൽ സംഘ്​പരിവാർ പ്രവർത്തകർ പ്രചരിപ്പിക്കുന്നത്​.

വസ്തുതാ പരിശോധന പോർട്ടലായ ആൾട്ട്​ ന്യൂസ് നടത്തിയ പരിശോധനയിൽ ഏതാനും വർഷങ്ങൾക്ക്​ മുമ്പ്​ നടന്ന ഇടതുപരിപാടിയുടെ ചിത്രങ്ങളാണ്​​ ഇതെന്ന്​ കണ്ടെത്തി​. 2019ലും 2014ലും നടന്ന ഇടതുമുന്നണിയുടെ കൂറ്റൻ റാലിയുടെ ചിത്രമാണ്​ അടിച്ചുമാറ്റിയത്​. റാലിയുടെ ചിത്രം കഴിഞ്ഞ വർഷം പശ്ചിമ ബംഗാൾ സി.പി.എം ട്വീറ്റ് ചെയ്തിരുന്നു. ഇതിൽ ചുവന്ന പതാകകൾ തെളിഞ്ഞുകാണാം. എന്നാൽ, ബി.ജെ.പി ഹാൻഡിലുകൾ ഈ കൊടികളെ കാവിയായി തെറ്റിദ്ധരിപ്പിക്കുന്ന വിധത്തിൽ എഡിറ്റ്​ ചെയ്​താണ്​ അവതരിപ്പിച്ചിരിക്കുന്നത്​.