മന്ത്രിക്കെതിരായ ആക്രമണം: സ്ഥാനമൊഴിയുമെന്ന് ബി.ജെ.പി മധുര ജില്ലാ പ്രസിഡന്റ്; സ്ഥാനത്തേക്കാൾ വലുത് മനസമാധാനം

ചെന്നൈ: തമിഴ്നാട് ധനമന്ത്രി പളനിവേൽ ത്യാഗ രാജന്റെ കാറിന് നേരെ ചെരുപ്പ് ഏറെ ഉണ്ടായതിന് പിന്നാലെ സ്ഥാനംമൊഴിയാൻ തയാറായി ബി.ജെ.പി മധുര ജില്ലാ പ്രസിഡന്റ്. ജില്ലാ പ്രസിഡന്റ് ശരവണനാണ് സ്ഥാനം രാജിവെക്കുമെന്ന് അറിയിച്ചത്.

മന്ത്രിയുടെ കാറിന് നേരെ ആക്രമണമുണ്ടായത് തന്നെ അസ്വസ്ഥനാക്കിയെന്ന് ശരവണൻ പറഞ്ഞു. അദ്ദേഹത്തെ നേരിട്ട് കണ്ട് താൻ മാപ്പ് പറഞ്ഞു. ഇപ്പോൾ തനിക്ക് ആശ്വാസമുണ്ടെന്നും ബി.ജെ.പി ജില്ലാ പ്രസിഡന്റ് പ്രതികരിച്ചു. മനസമാധാനമാണ് ബി.ജെ.പിയിലെ സ്ഥാനത്തേക്കാളും വലുത്. ഞാൻ എന്റെ രാജിക്കത്ത് നൽകാൻ പോവുകയാണ്. ഡി.എം.കെയിൽ ചേരാൻ തീരുമാനമൊന്നും എടുത്തിട്ടില്ല. എന്നാൽ, ഡി.എം.കെയിൽ ചേരുന്നതിൽ തെറ്റൊന്നുമില്ലെന്നും അദ്ദേഹം കൂട്ടിച്ചേർത്തു.

മധുരയിൽ തമിഴ്‌നാട് ധനമന്ത്രി പളനിവേൽ ത്യാഗ രാജന്റെ കാറിന് നേരെ ചെരുപ്പ് എറിഞ്ഞ അഞ്ച് ബി.ജെ.പി പ്രവർത്തകർ കഴിഞ്ഞ ദിവസം അറസ്റ്റിലായിരുന്നു. ജമ്മു കശ്മീരിലെ രജൗരി ജില്ലയിൽ ഭീകരരുമായുണ്ടായ ഏറ്റുമുട്ടലിൽ ഡ്യൂട്ടിക്കിടെ കൊല്ലപ്പെട്ട റൈഫിൾമാൻ ഡി. ലക്ഷ്മണന് ആദരാഞ്ജലി അർപ്പിക്കാനായിരുന്നു മന്ത്രി മധുരയിലെത്തിയത്.

അറസ്റ്റിലായ അഞ്ച് പേരും ബി.ജെ.പി പാർട്ടി അംഗങ്ങളാണ്. അന്വേഷണം നടക്കുകയാണെന്നും പൊലീസ് ഉദ്യോഗസ്ഥൻ പ്രതികരിച്ചിരുന്നു. പാർട്ടി സംസ്ഥാന അധ്യക്ഷൻ കെ. അണ്ണാമലൈയെ സ്വീകരിക്കാൻ എത്തിയ ബി.ജെ.പി പ്രവർത്തകർ മന്ത്രിക്കെതിരെ മുദ്രാവാക്യം വിളിച്ചിരുന്നു.

ആദരാഞ്ജലികൾ അർപ്പിക്കാൻ ഉദ്ദേശിച്ചുള്ള സ്ഥലത്ത് ബി.ജെ.പിയിൽ നിന്നുള്ള പാർട്ടി പ്രവർത്തകരെക്കൊണ്ട് നിറഞ്ഞിരുന്നുവെന്ന് ഡി.എം.കെ പ്രവർത്തകർ പറഞ്ഞു. ബി.ജെ.പി സംസ്ഥാന അധ്യക്ഷൻ കെ. അണ്ണാമലൈയും ആദരാഞ്ജലി അർപ്പിക്കാൻ എത്തിയിരുന്നു. ജനക്കൂട്ടത്തെ നിയന്ത്രിക്കാൻ പൊലീസ് ശ്രമിച്ചതോടെ പാർട്ടി പ്രവർത്തകരെ മാറ്റണമെന്ന് മന്ത്രി ആവശ്യപ്പെട്ടതായി വാർത്തകൾ പരന്നിരുന്നു.