ബി.ജെ.പി നൽകുന്നത്​ വ്യാജ വാഗ്​ദാനങ്ങൾ; ജനം തിരിച്ചറിയണമെന്ന്​ ഛത്തിസ്​ഗഢ്​ മുഖ്യമന്ത്രി

ന്യൂഡൽഹി: വ്യാജ വാഗ്​ദാനങ്ങൾ നൽകി ബി​.ജെ.പി ജനങ്ങളെ വഞ്ചിക്കുകയാണെന്ന്​ ഛത്തിസ്​ഗഢ്​ മുഖ്യമന്ത്രി ഭൂപേഷ്​ ബ ാഘേൽ. തൊഴിലില്ലായ്​മയോ കർഷക പ്രതിസന്ധിയോ പരിഹരിക്കാൻ ബി.ജെ.പിക്ക്​ കഴിഞ്ഞിട്ടില്ലെന്ന്​ പ്രശ്​നങ്ങൾ മൂടി വെച്ച്​ ഹിന്ദു- മുസ്​ലിം വേർതിരിവ്​ മാത്രമാണ്​ ചർച്ച ചെയ്യുന്നതെന്നും ബാഘേൽ വിമർശിച്ചു. ഡൽഹി തെരഞ്ഞെടുപ്പ്​ പ്രചരണറാലിയിൽ സംസാരിക്കുകയായിരുന്നു അദ്ദേഹം.

രാജ്യത്ത്​ സാധാരണക്കാർക്ക്​ ഗുണമുള്ള ഒരു കാര്യവും നടപ്പാക്കുന്നില്ല. കർഷകർ ഇപ്പോഴും പ്രതിസന്ധിയിലാണ്​. തൊഴിലില്ലായ്​മ, പണപ്പെരുപ്പം എന്നിവ ചരിത്രത്തിലെ ഏറ്റവും ഉയർന്ന നിരക്കിലാണ്​. പ്രശ്​നങ്ങൾക്ക്​ പരിഹാരം കാണാതെ ബി.ജെ.പി സർക്കാർ പൗരത്വ ഭേദഗതി നിയമം നടപ്പാക്കാനാണ്​ ​ധൃതി കാണിക്ക​ുന്നതെന്നും ബാഘേൽ ആരോപിച്ചു.

ബി.ജെ.പി ഹിന്ദുക്കളെയും മുസ്​ലിംകളെയും കുറിച്ചാണ്​ സംസാരിക്കുന്നത്​. എന്നാൽ തങ്ങൾ സി.എ.എക്കും എൻ.ആർ.സിക്കും എൻ.പി.ആറിനുമെതിരെയാണ്​ സംസാരിക്കുന്നതെന്ന​ും ഭൂപേഷ്​ ബാഘേൽ ചൂണ്ടിക്കാട്ടി.

ഡൽഹിയിൽ അഞ്ചു വർഷം കൊണ്ട്​ അരവിന്ദ്​ കെജ്​രിവാൾ നടത്തിയ പ്രവർത്തനങ്ങൾ ഛത്തീസ്​ഗഢിലെ കോൺഗ്രസ്​ സർക്കാർ ഒരു വർഷം കൊണ്ട്​ പൂർത്തിയാക്കിയതാണെന്നും ബാഘേൽ കൂട്ടിച്ചേർത്തു.