ഗുജറാത്ത്​ തദ്ദേശ തെരഞ്ഞെടുപ്പിൽ വൻവിജയവുമായി ബി.ജെ.പി

ഗുജറാത്ത്​ തദ്ദേശ തെരഞ്ഞെടുപ്പിൽ വൻവിജയവുമായി ബി.ജെ.പിഅഹ്​മദാബാദ്​: തദ്ദേശ തെരഞ്ഞെടുപ്പ്​ നടന്ന ഗുജറാത്തിൽ വലിയ വിജയം കുറിച്ച്​ ബി.ജെ.പി. 31 ജില്ലാ പഞ്ചായത്തുകളിൽ എല്ലാം സംസ്​ഥാന ഭരണം കൈയാളുന്ന കക്ഷിക്കൊപ്പം നിന്നു. 980 ജില്ലാ പഞ്ചായത്ത്​ സീറ്റുകളിൽ 771ഉം ബി.ജെ.പിയെ തുണച്ചപ്പോൾ കോൺഗ്രസ്​ 164ഉം എ.എ.പി 31ഉം സീറ്റുകൾ നേടി. 81 മുനിസിപ്പാലിറ്റികളിൽ 75ഉം ബി.ജെ.പിക്കു തന്നെ. മൊത്തം 2720 സീറ്റുകളിൽ 2017ഉം ഭാരതീയ ജനത പാർട്ടി കുത്തകയാക്കി. കോൺഗ്രസിന്​ 375 എണ്ണം മാത്രമാണ്​ നിലനിർത്താനായത്​. എ.എ.പി ഒമ്പതും മറ്റുള്ളവർ രണ്ടും സീറ്റുകൾ നേടി. 231 താലൂക പഞ്ചായത്തുകളിൽ ബി.ജെ.പി നേടിയത്​ 196 എണ്ണം. 33 എണ്ണം കോൺഗ്രസിനെ തുണച്ചു.

വഡോദര ജില്ലാ പഞ്ചായത്തിൽ 34 സീറ്റിൽ 27ഉം ബി.ജെ.പിക്കൊപ്പം നിന്നു. ചരിത്രത്തിലാദ്യമായി തപി ജില്ലാ പഞ്ചായത്തും പാർട്ടി പിടിച്ചു. കച്ച്​ മേഖലയിൽ അഞ്ച്​ മുനിസിപ്പാലിറ്റികളും കോൺഗ്രസിനെ കൈവിട്ടു. പലയിടത്തും ബി.ജെ.പിക്ക്​ ലഭിച്ചത്​ മൃഗീയ ഭൂരിപക്ഷം.

സർക്കാർ പാവങ്ങൾക്കായി നടത്തുന്ന പദ്ധതികൾക്കുള്ള അംഗീകാരമാണ്​ വിജയമെന്ന്​ കേന്ദ്ര ആഭ്യന്തര മന്ത്രി അമിത്​ ഷാ പറഞ്ഞു.

കഴിഞ്ഞ ആഴ്ച ആറ്​പ്രധാന മുനിസിപ്പൽ കോർപറേഷനുകളിലേക്ക്​ നടന്ന തെരഞ്ഞെടുപ്പും ബി.ജെ.പി തൂത്തുവാരിയിരുന്നു. സൂറത്ത്​, രാജ്​കോട്ട്​, വഡോദര, ഭാവ്​നഗർ, ജാംനഗർ, അഹ്​മദാബാദ്​ എന്നിവയിലായിരുന്നു തെരഞ്ഞെടുപ്പ്​.

ആം ആദ്​മി പാർട്ടി ആദ്യമായി ഗോദയിലിറങ്ങി സാന്നിധ്യമറിയിച്ചതും ശ്രദ്ധേയമായി. തന്‍റെ പാർട്ടി 2022ലെ തെരഞ്ഞെടുപ്പിന്​ ഒരുക്കം അറിയിച്ചതായി എ.എ.പി നേതാവ്​ അരവിന്ദ്​ കെജ്​രിവാൾ പറഞ്ഞു.