ബംഗാളിൽ ജെ.പി. നദ്ദയുടെ വാഹനവ്യൂഹത്തിന്​ നേരെ ആക്രമണം; 'സ്​പോൺസേഡ്​ വയലൻസെന്ന്​' അമിത്​ഷാ

​കൊൽക്കത്ത: രണ്ട് ദിവസത്തെ സന്ദർശനത്തിനായി ബുധനാഴ്​ച ബംഗാളിലെത്തിയ ബി.ജെ.പി ദേശീയ അധ്യക്ഷൻ ജെ.പി. നദ്ദയുടെ വാഹനവ്യൂഹത്തിന് നേരെ ആക്രമണം. പാർട്ടിപ്രവർത്തകരുടെ യോഗത്തിൽ പ​ങ്കെടുക്കാൻ​ സൗത്ത് 24 പാർഗനാസ് ജില്ലയിലെ ഡയമണ്ട് ഹാർബറിലേക്കുള്ള യാത്രക്കിടയിലാണ് കല്ലേറുണ്ടായത്. ബി.ജെ.പി ജന. സെക്രട്ടറി കൈലാഷ്​ വിജയ്​വർഗിയ ഉൾപ്പെടെ നിരവധിപേർക്ക്​ പരിക്കേറ്റതായി പാർട്ടിവൃത്തങ്ങൾ പറഞ്ഞു. എന്നാൽ, ബുള്ളറ്റ്​പ്രൂഫ്​ കാറിലായിരുന്ന നദ്ദക്ക്​ പരിക്കില്ല. ദുർഗാദേവിയുടെ അനുഗ്രഹം കൊണ്ടാണ്​ രക്ഷപ്പെട്ടതെന്ന്​ നദ്ദ പ്രതികരിച്ചു.

ആക്രമണത്തിന് പിന്നിൽ തൃണമൂൽ കോൺഗ്രസാണെന്ന് ബി.ജെ.പി ആരോപിച്ചു. അസഹിഷ്ണുത നിറഞ്ഞ സംസ്ഥാനമായി ബംഗാൾ മാറിയെന്ന്​ ജെ.പി. നദ്ദ പ്രതികരിച്ചു. മമത സർക്കാറിന് അധികകാലം നിലനിൽപില്ലെന്നും ഗുണ്ടാരാജ് അവസാനിപ്പിക്കുമെന്നും നദ്ദ വ്യക്തമാക്കി.

സുരക്ഷാവീഴ്ച ചൂണ്ടിക്കാട്ടി കേന്ദ്ര ആഭ്യന്തര മന്ത്രി അമിത് ഷാക്കും സംസ്ഥാന സർക്കാറിനും കത്തയച്ചിട്ടുണ്ടെന്ന്​ ബംഗാളിലെ ബി.ജെ.പി നേതാവ്​ ദിലീപ് ഘോഷ് വ്യക്തമാക്കി. സംഭവത്തിൽ കേന്ദ്ര ആഭ്യന്തര മന്ത്രാലയം സംസ്ഥാന സർക്കാറിനോട് റിപ്പോർട്ട് തേടിയിട്ടുണ്ട്. 'സ്​പോൺസേഡ്​ വയലൻസ്​' എന്നാണ്​ അമിത്​ഷാ സംഭവത്തെ വിശേഷിപ്പിച്ചത്​.

നദ്ദക്കെതിരായ ആക്രമണത്തിൽ ഗവർണർ ജഗ്​ദീപ്​ ധൻഖർ ആശങ്ക പ്രകടിപ്പിച്ചു. ക്രമസമാധാന തകർച്ചക്കെതിരെ ജാഗ്രത പാലിക്കാൻ ചീഫ്​ സെ​ക്രട്ടറിയോടും പൊലീസ്​ മേധാവിയോടും ഗവർണർ നിർദേശിച്ചു.

അതേസമയം, ആരോപണം തൃണമൂൽ കോൺഗ്രസ് നിഷേധിച്ചു. പാർട്ടിക്ക് പങ്കില്ലെന്നും ബി.ജെ.പിയുടെ ഗുണ്ടകളാണ് അക്രമണത്തിന് പിന്നിലെന്നും ടി.എം.സി നേതാവ് മദൻ മിത്ര പറഞ്ഞു.