അടുത്ത ഗുജറാത്ത്​ മുഖ്യമന്ത്രി ആര്​? ബി.ജെ.പി നിയമസഭ കക്ഷിയോഗം ഇന്ന്​ അഹ്​മദാബാദിൽ

ഗാന്ധിനഗർ: ഗുജറാത്ത്​ മുഖ്യമന്ത്രിസ്​ഥാനം വിജയ്​ രൂപാണി രാജിവെച്ചതോടെ അടുത്ത മുഖ്യമന്ത്രിയെ തീരുമാനിക്കാൻ ബി.ജെ.പിയുടെ നിയമസഭ കക്ഷി യോഗം ഞായറാഴ്ച. അഹ്​മദാബാദിലെ ബി.ജെ.പി ആസ്​ഥാനത്ത്​ ഉച്ച രണ്ടുമണിയോടെയാണ്​ യോഗം.

ഗുജറാത്ത്​ ഉപമുഖ്യമന്ത്രി നിതിൻ പ​േട്ടൽ, മുൻ മന്ത്രി ഗോർദൻ സദാഫിയ, ലക്ഷദ്വീപ്​ അഡ്​മിനിസ്​ട്രേറ്റർ പ്രഫുൽ ഖോഡ പ​േട്ടൽ എന്നിവരാണ്​ മുഖ്യമന്ത്രിമാരുടെ പട്ടികയിൽ. ഗുജറാത്ത്​ ബി.ജെ.പി അധ്യക്ഷൻ സി.ആർ. പ​ാട്ടീലിന്‍റെ പേരും മുഖ്യമന്ത്രി സ്​ഥാനത്തേക്ക്​ പരിഗണിക്കുന്നുണ്ട്​.

പാർട്ടി ആസ്​ഥാന​ത്ത്​ ചേരുന്ന യോഗത്തിൽ എല്ലാ ബി.ജെ.പി എം.എൽ.എമാരും പ​െങ്കടുക്കും. ശനിയാഴ്ച വൈകിട്ട്​ തന്നെ കേന്ദ്ര ആരോഗ്യമന്ത്രി മൻസുഖ്​ മാണ്ഡവ്യ, ഗുജറാത്ത്​ ഉപമുഖ്യമന്ത്രി നിതിൻ പ​േട്ടൽ എന്നിവർ ഗാന്ധിനഗറിലെ ബി.ജെ.പി ആസ്​ഥാനത്തെത്തിയിരുന്നു. കൂടാതെ നരേന്ദ്ര സിങ്​ തോമറും പ്രഹ്ലാദ്​ ജോഷിയും ഞായറാഴ്ച എത്തിയേക്കും.

അടുത്ത വർഷം അവസാനം നിയമസഭ തെരഞ്ഞെടുപ്പ്​ നടക്കാനിര​ിക്കേയാണ്​ വിജയ്​ രൂപാണിയുടെ രാജി. ബി.ജെ.പി കേന്ദ്രനേതൃത്വത്തിനും പ്രധാനമന്ത്രി നരേന്ദ്രമോദിക്കും രൂപാണി നന്ദി രേഖപ്പെടുത്തിയിരുന്നു. കൂടാതെ പാർട്ടി തന്നെ ഏൽപ്പിക്കുന്ന ഏത്​ ചുമതലയും ഏറ്റെടുക്കുമെന്നും അദ്ദേഹം പറഞ്ഞു. വ്യക്തിപരമായ കാരണങ്ങളെ തുടർന്നാണ്​ രാജിയെന്നായിരുന്നു രൂപാണിയുടെ പ്രസ്​താവന.

എന്നാൽ കോവിഡ്​ പ്രതിരോധത്തിൽ വിജയ്​ രൂപാണി പരാജയമായിരുന്നുവെന്നാണ്​ ബി.ജെ.പിയുടെ കണക്കുകൂട്ടൽ. 'ഗുജറാത്തിലെ കോവിഡ്​ സാഹചര്യത്തിൽ ജനങ്ങൾ തൃപ്​തരല്ല. ബി.ജെ.പി സർക്കാറിന്‍റെ പ്രവർത്തനങ്ങളിൽ ജനങ്ങൾ രോഷാകുലരാകുകയും ചെയ്​തിരുന്നു. വിജയ്​ രൂപാ​ണിക്ക്​ മികച്ച പ്രകടനം കാഴ്ചവെക്കാൻ കഴിഞ്ഞില്ല' -ബി.ജെ.പി വൃത്തങ്ങൾ പറയുന്നു.

കൂടാതെ 2017ന്​ ശേഷമുള്ള സംസ്​ഥാനത്തെ ബി.ജെ.പിയുടെ പ്രവർത്തനങ്ങളും സംസ്​ഥാന തലവൻ സി.ആർ. പാട്ടീലുമായുള്ള അഭിപ്രായവ്യത്യാസവും രൂപാണിക്ക്​ വിനയാകുകയായിരുന്നുവെന്നാണ്​ വിവരം.