20 രൂപയുടെ പാൻമസാല കടംകൊടുത്തില്ല; കട ഉടമയുടെ മകനെ വെടിവച്ചുകൊന്നു

പറ്റ്​ന: 20 രൂപയുടെ പാൻമസാല കടംകൊടുക്കാത്തതിന്​ ബീഹാറിൽ കട ഉടമയുടെ മകനെ വെടിവച്ചുകൊന്നു. തിങ്കളാഴ്ച രാവിലെ ത്രിവേണിഗഞ്ചിലാണ്​ സംഭവം. പ്രദേശത്തെ അറിയപ്പെടുന്ന ഗുണ്ട അജിത് കുമാർ ആണ്​ പലചരക്ക് കട ഉടമയുടെ ഇളയ മകൻ മിഥിലേഷിനെ വെടിവച്ച്​ കൊന്നതെന്ന്​ പൊലീസ്​ പറഞ്ഞു. ഞായറാഴ്ചയാണ്​ ഇതുസംബന്ധിച്ച തർക്കം നടക്കുന്നത്​. അജിത് കുമാർ മരിച്ചയാളുടെ പിതാവിനോട് പാൻ മസാലയെചൊല്ലി വഴക്കുണ്ടാക്കിയിരുന്നു.

കടംകൊടുക്കാത്തതിൽ പ്രകോപിതനായ ഗുണ്ട മോട്ടോർ സൈക്കിളിൽ കൂട്ടാളികളോടൊപ്പം പിറ്റേന്ന് പലചരക്ക് കടയിലേക്ക് മടങ്ങി എത്തുകയായിരുന്നു. ആ സമയത്ത് ഉടമയുടെ ഇളയ മകനാണ്​ കടയിൽ ഉണ്ടായിരുന്നത്​. അജിത് കുമാറും ഇയാളും തമ്മിൽ വീണ്ടും വഴക്കുണ്ടായി. തുടർന്ന്​ തോ​െക്കടുത്ത്​ വെടിവയ്​ക്കുകയായിരുന്നു. കടയുടെ അടുത്തുണ്ടയിരുന്ന മിഥിലേഷിന്‍റെ ജ്യേഷ്ഠൻ ഓടി എത്തിയെങ്കിലും കൊലയാളികൾ കടന്നുകളഞ്ഞിരുന്നു.

ത്രിവേണിഗഞ്ച് പോലീസ് കേസിൽ അന്വേഷണം ആരംഭിച്ചു. കൊലയാളികളെ പിടികൂടാനായി തിരച്ചിൽ ആരംഭിച്ചിട്ടുണ്ട്​. കുറ്റവാളികളെ തിരിച്ചറിഞ്ഞതായും​ തിരച്ചിൽ ആരംഭിച്ചതായും എസ്ഡിഎം ഷെയ്ഖ് ഹസ്സൻ പറഞ്ഞു. 'എന്‍റെ ഇളയ സഹോദരനെ വെടിവച്ചു കൊന്നു. ഞാനും സമീപത്തുണ്ടായിരുന്നു. ഞാൻ കടയിലെത്തിയപ്പോഴേക്കും അക്രമികൾ രക്ഷപ്പെട്ടു'- മരിച്ച മിഥിലേഷ് കുമാറിന്‍റെ ജ്യേഷ്ഠൻ പറഞ്ഞു.