ബിഹാറിൽ ആരോഗ്യ പ്രവർത്തകർക്ക്​ നേരെ പരക്കെ ആക്രമണം

പാറ്റ്ന: കോവിഡ്​ വ്യാപനത്തെ തുടർന്ന്​ ബിഹാറിൽ ഹോട്ട്​ സപോട്ടുകളാക്കി കണക്കാക്കിയിട്ടുള്ള പ്രദേശങ്ങളിൽ പരിശോധനക്കെത്തിയ ആരോഗ്യ പ്രവർത്തകർക്ക് നേരെ ആക്രമണം. 24 മണിക്കൂറിനുള്ളിൽ സംസ്ഥാനത്തെ നാലിടങ്ങളിലാണ് ആരാഗ്യ പ്രവർത്തകർ ആക്രമിക്കപ്പെട്ടത്​.

മുഖ്യമന്ത്രി നിതീഷ്​ കുമാറി​​െൻറ ജന്മനാടായ ബിഹാർ ഷരീഫിലാണ്​ രണ്ട്​ കേസ ുകൾ രജിസ്​റ്റർ ചെയ്​തത്​. നളന്ദ, ഔറംഗബാദ്​, മോത്തിഹാരി എന്നിവിടങ്ങളിലും ഡോർ ടു ഡോർ സ്​ക്രീനിങ്ങിനെത്തിയ ആരോഗ്യ പ്രവർത്തകരെ പ്രദേശവാസികൾ കയ്യേറ്റം ചെയ്​ത സംഭവമുണ്ടായി.

ഹോട്ട്​സ്​പോട്ടായി കണക്കാക്കുന്ന നളന്ദയിൽ ലോക്ക്​ഡൗൺ പ്രഖ്യാപിക്കുന്നതിന്​ തൊട്ട്​മുമ്പ്​ മതസമ്മേളനം നടത്തിയിരുന്നു. സമ്മേളനത്തിൽ പ​ങ്കെടുത്തതിനെ തുടർന്ന്​ നിരീക്ഷണത്തിൽ കഴിയുന്നവരെ പരിശോധിക്കാൻ എത്തിയ ആരോഗ്യ പ്രവർത്തകരെ പ്രദേശവാസികൾ കയ്യേറ്റത്തിന്​ ശ്രമിച്ച്​ ഓടിക്കുകയായിരുന്നു.

ഔറംഗബാദിൽ കോവിഡ്​ സംശയിക്കുന്നവരെ പരിശോധിക്കാനെത്തിയ സംഘത്തെ ഗ്രാമവാസികൾ ആക്രമിച്ചു. ഡൽഹിയിൽ നിന്നും മടങ്ങിയെത്തിയവരെ പരിശോധിക്കാനെത്തിയപ്പോഴാണ്​ ആരോഗ്യ പ്രവർത്തകർ ആക്രമിക്കപ്പെട്ടത്​.

മോത്തിഹാരിയിലെ ഹർസിദ്ധിയിൽ ജനം ആരോഗ്യ പ്രവർത്തകരെ തടഞ്ഞുവെക്കുകയും അവശ്യവസ്​തുക്കൾ ലഭ്യമാക്കാത്തതിനെ ചൊല്ലി തർക്കിക്കുകയും കയ്യേറ്റത്തിന്​ ശ്രമിക്കുകയും ചെയ്​തു. ആരോഗ്യ പ്രവർത്തകർക്കെതിരായ അക്രമങ്ങളിൽ ശക്തമായ നടപടിയുണ്ടാകുമെന്ന്​ ആരോഗ്യ വകുപ്പ്​ പ്രിൻസിപ്പൽ സെക്രട്ടറി സഞ്​ജയ്​ കുമാർ അറിയിച്ചു.

ബിഹാറിലെ സിവാൻ, ബെഗുസരായ്​, നളന്ദ, നവാഡ എന്നീ പ്രദേശങ്ങൾ കോവിഡ്​​ റെഡ്​ സോണായി തിരിച്ചിട്ടുണ്ട്​. സംസ്ഥാനത്ത്​ ഇതുവരെ 83 പേർക്ക്​​ കോവിഡ്​ സ്ഥിരീകരിക്കുകയും ഒരാൾ മരിക്കുകയും ചെയ്​തു.