കർഷകസമരം: സുപ്രീംകോടതി നിയോഗിച്ച സമിതിയിൽ നിന്ന്​ ഭൂപീന്ദർ സിങ്​ മാൻ പിന്മാറി

ന്യൂഡൽഹി: കർഷക സമരം പരിഹരിക്കുന്നതിന്​ സുപ്രീംകോടതി നിയോഗിച്ച നാലംഗ സമിതിയിൽ നിന്ന്​ കാർഷിക-സാമ്പത്തിക വിദഗ്​ധൻ ഭൂപീന്ദർ സിങ്​ മാൻ പിന്മാറി. പഞ്ചാബിലെ കർഷകരുടെ താൽപര്യം പരിഗണിച്ച്​ താൻ സമിതിയിൽ നിന്ന്​ പിന്മാറുകയാണെന്ന്​ ഭുപീന്ദർ സിങ്​ മാൻ പറഞ്ഞു.

സമിതിയിൽ ഉൾപ്പെടുത്തിയ സുപ്രീംകോടതിയോട്​ നന്ദി അറിയിക്കുകയാണ്​. കർഷകനെന്ന നിലയിലും കാർഷിക യുണിയൻ നേതാവെന്ന നിലയിലും കർഷകരുടെ വികാരം എനിക്ക്​ മനസിലാക്കാനാവും. ഈയൊരു സാഹചര്യത്തിൽ എനിക്ക്​ ലഭിച്ച പദവി ഉപേക്ഷിക്കാൻ തയാറാണ്​. പഞ്ചാബിലെ കർഷകരുടെ താൽപര്യങ്ങളെ തനിക്ക്​ ഉപേക്ഷിക്കാനാവില്ലെന്ന്​ ഭൂപീന്ദർ സിങ്​ മാൻ പറഞ്ഞു.

അതേസമയം, ഭൂപീന്ദർ സിങ്​ മാൻ സമിതിയിൽ നിന്ന്​ പിന്മാറുകയാണെന്ന്​ ഭാരതീയ കിസാൻ യൂണിയനും ട്വിറ്ററിലൂടെ അറിയിച്ചിട്ടുണ്ട്​. കഴിഞ്ഞ ദിവസമാണ്​ കർഷക പ്രശ്​നം പരിഹരിക്കാൻ സുപ്രീംകോടതി നാലംഗ സമിതിയെ നിയോഗിച്ചത്​. എന്നാൽ, സമിതിക്കെതിരെ രൂപീകരണവേളയിൽ തന്നെ വിമർശനങ്ങൾ ഉയർന്നിരുന്നു.