ഭാര്യയുടെ ആഭരണം വിറ്റ്​ ഓ​ട്ടോ 'ആംബുലൻസാക്കി'; ജാവേദിന്‍റെ ഓട്ടം ഇപ്പോൾ ജീവനുകൾ രക്ഷിക്കാൻ

ഭോപാൽ: കഴിഞ്ഞ രണ്ടാഴ്ചയായി ഭോപാൽ നഗരത്തിലെ ജാവേദ്​ ഖാൻ എന്ന ഓ​ട്ടോ ഡ്രൈവർ ഓടുന്നത്​ സ്വന്തം കുടുംബം പുലർത്താനല്ല.ഒരുപാട്​ കുടുംബങ്ങളിലെ ജീവിതങ്ങൾ അണയാതിരിക്കാനാണ്​. കോവിഡ്​ ബാധിച്ച്​ ഗുരുതരാവസ്​ഥയിലായ ഉറ്റവരെ ആശുപത്രികളിലെത്തിക്കാൻ വഴിയില്ലാതെ വിഷമിക്കുന്നവരെ സഹായിക്കാൻ സ്വന്തം ഓ​​ട്ടോ 'ആംബുലൻസ്'​ ആക്കിയിരിക്കുകയാണ്​ ജാവേദ്​ ഖാൻ. സൗജന്യമായി രോഗികളെ കയറ്റി കൊണ്ടുപോകുക മ​ാ​ത്രമല്ല ജാവേദ്​ ചെയ്യുന്നത്​. അവർക്ക്​ ആവശ്യമുള്ള ജീവൻരക്ഷാ സംവിധാനങ്ങളും ഓ​ട്ടോയിൽ ഒരുക്കിയിട്ടുണ്ട്​. ഓക്​സിജൻ സിലിണ്ടറും ഓക്​സിമീറ്ററും സാനിറ്റെസറും പിപിഇ കിറ്റും അവശ്യമരുന്നുമൊക്കെ ഈ 'കുഞ്ഞ്​ ആംബുലൻസിൽ' ലഭ്യമാണ്​​. ഇതിനൊക്കെയുള്ള പണം കണ്ടെത്തിയതാക​ട്ടെ, ഭാര്യയുടെ ആഭരണം വിറ്റും.

അത്യാസന്ന നിലയിൽ കഴിയുന്നവരെ ആശുപത്രിയിൽ കൊണ്ടുപോകാൻ വാഹന സൗകര്യമില്ലാതെ ആളുകൾ പൊറുതി മുട്ടുന്നതിന്‍റെ വാർത്തകൾ കണ്ട്​ മനം​െനാന്താണ്​ ജാവേദ്​ ഇങ്ങനെയൊരു തീരുമാനമെടുത്തത്​. ഉള്ള ആരോഗ്യവും സമ്പാദ്യവും കൊണ്ട്​ ഇത്തരം ആളുകൾക്ക്​ സഹായം നൽകാനുറച്ചപ്പോൾ

ഭാര്യ പിന്തുണയുമായി കൂടെ നിന്നു. ഭാര്യ ഊരിക്കൊടുത്ത മാല വിറ്റ്​ കിട്ടിയ പണം ​കൊണ്ടാണ്​ ഓ​ട്ടോയിൽ ഓക്​സിജൻ സിലിണ്ടറും മറ്റും വാങ്ങി വെച്ചത്​. ഗോവിന്ദ്​പുരയിലുള്ള ഒാക്​സിജൻ പ്ലാന്‍റിലെത്തിയാണ്​ ജാവേദ്​ ഓക്​സിജൻ നിറക്കുന്നത്​. നാലും അഞ്ചും മണിക്കുർ കാത്തുനിന്നാലാണ്​ ഓക്​സിജൻ ലഭിക്കുക. ഒരു സിലിണ്ടർ റീഫിൽ ചെയ്യുന്നതിന്​ 450 മുതൽ 550 രൂപ വരെയാണ്​ വില.

'ആംബുലൻസ്​ കിട്ടാതെ വന്നതോടെ ഉറ്റവരെ ആശുപത്രിയിലെത്തിക്കാൻ ആളുകൾ ഇരുചക്ര വാഹനങ്ങളിലും കാളവണ്ടിയിലുമൊക്കെ പോകുന്നതിന്‍റെ ദൃശ്യങ്ങൾ ടിവിയിലും വാട്​സ്​ആപ്പിലുമൊക്കെ കണ്ട്​ മനം നൊന്താണ്​ ഇത്തരമൊരു തീരുമാനമെടുത്തത്​. അതിന്​ പണമില്ലാതെ വിഷമിക്കുന്നത്​ കണ്ട്​ ഭാര്യ മാല ഉൗരിത്തരികയായിരുന്നു. എന്‍റെ നമ്പർ 7999909494 എല്ലാ സമൂഹ മാധ്യമങ്ങളിലും നൽകിയിട്ടുണ്ട്​. ആംബുലൻസ്​ ലഭിക്കാത്തവർക്കും മറ്റ്​ സഹായങ്ങൾ വേണ്ടവർക്കും എപ്പോൾ വേണമെങ്കിലും എന്നെ വിളിക്കാം. ഒമ്പത്​ ഗുരുതര രോഗികളെ സമയത്തിന്​ ആശുപത്രിയിലെത്തിച്ച്​ രക്ഷിക്കാനായത്​ വലിയ പുണ്യമായി കരുതുന്നു.' -ജാവേദ്​ പറയുന്നു.