ഭീം ആർമിക്ക്​ പോപുലർ ഫ്രണ്ടുമായി ബന്ധമില്ലെന്ന്​ ഇ.ഡി; കലാപത്തിനായി 100 കോടി ഇറക്കിയെന്ന ആരോപണം വ്യാജം

ന്യൂഡൽഹി: ചന്ദ്രശേഖർ ആസാദി​ന്‍റെ ഭീം ആർമിക്ക്​ പോപുലർ ഫ്രണ്ട്​ ഓഫ്​ ഇന്ത്യയുമായി ബന്ധമില്ലെന്ന്​ എൻഫോഴ്​സ്​മെൻറ്​ ഡയറക്​ടറേറ്റ്​. കേസി​ന്‍റെ പേരിൽ ഹാഥറസിൽ കലാപം നടത്താനായി എത്തിച്ച 100 കോടി പിടിച്ചെടുത്തുവെന്നത്​ നുണയാണെന്നും ഇ.ഡി വ്യക്തമാക്കി.

ഭീം ആർമി അടക്കമുള്ള സംഘടനകൾ ഹാഥറസ്​ ഇരയുടെ കുടുംബത്തെ സ്വാധീനിച്ച്​ കേസ്​ വഴിതിരിച്ചു വിടാനുള്ള ശ്രമങ്ങൾ നടത്തുകയാണെന്ന മുൻ ഉത്തർപ്രദേശ്​ ഡി.ജി.പി ബ്രിജ്​ ലാലി​ന്‍റെ ആരോപണങ്ങളുടെ പശ്ചാത്തലത്തിലാണ്​ ഇ.ഡിയുടെ വെളിപ്പെടുത്തൽ.

ഹാഥറസ്​ പെൺകുട്ടിയുടെ കുടുംബം ആദ്യം ഒരാൾക്കെതിരായിരുന്നു പരാതിപ്പെ​ട്ടതെങ്കിലും എട്ട്​ ദിവസങ്ങൾക്ക്​ ശേഷം അവർ മൂന്നു​ പേരെ കൂടി പ്രതികളാക്കിയെന്നായിരുന്നു ബ്രിജ്​ലാലിന്‍റെ ആരോപണം.

ഇതോടൊപ്പം പോപുലർ ഫ്രണ്ടും ​പോഷക സംഘടനയായ ക്യാമ്പസ്​ ഫ്രണ്ടും ഹാഥറസ്​ കേസുമായി ബന്ധപ്പെട്ട സമരങ്ങളിൽ സജീവമായെന്നും കലാപം നടത്താനായി 100 കോടി ഇറക്കിയെന്നുമാണ്​ മുൻ എസ്​.സി/ എസ്​.ടി കമീഷൻ അധ്യക്ഷൻ കൂടിയായിരുന്ന ബ്രിലജ്​ലാൽ പറഞ്ഞത്​.

ഭീം ആർമി, കോൺഗ്രസ്​, എ.എ.പി എന്നിവർ ചേർന്ന്​ ഹാഥ​റസിൽ കലാപത്തിന്​ ശ്രമിക്കുന്നതായി വിവരം കിട്ടിയതി​ന്‍റെ അടിസ്​ഥാനത്തിലാണ്​ യു.പി പൊലീസ്​ കൊല്ലപ്പെട്ട പെൺകുട്ടിയുടെ മൃതദേഹം പുലർച്ചെ കത്തിച്ചു കളഞ്ഞതെന്നും ഇദ്ദേഹം അഭിപ്രായപ്പെട്ടിരുന്നു.