കൈക്കൂലി: ഭാരതിയാർ സർവകലാശാല വി.സിക്ക്​ ​സസ്പെ​ൻഷൻ

കോയമ്പത്തൂർ: അധ്യാപക നിയമനത്തിന്​ 30 ലക്ഷം കൈക്കൂലി വാങ്ങിയ കേസിൽ ഭാരതിയാർ സർവകലാശാല വി.സി പ്രഫ. എ. ഗണപതിയെ സസ്​പെൻഡ്​ ചെയ്​ത്​ ഗവർണർ ബൻവാരിലാൽ പുരോഹിത്​ ഉത്തരവിട്ടു. ചൊവ്വാഴ്​ച രാത്രി ഒമ്പതോടെ സസ്​പെൻഡ്​ ചെയ്​ത വിവരം രാജ്​ഭവൻ വാർത്തക്കുറിപ്പിൽ അറിയിക്കുകയായിരുന്നു. കേസുമായി ബന്ധപ്പെട്ട്​ സർക്കാറിനും ഗവർണർക്കും പൊലീസ് റിപ്പോർട്ട്​ അയച്ചിരുന്നു. ഇതി​​​െൻറ അടിസ്​ഥാനത്തിലാണ്​ സസ്​പെൻഷൻ.

അതേസമയം, കേസിൽ റിമാൻഡിലായ വി.സി ഗണപതി, രസതന്ത്രം വിഭാഗം മേധാവി ധർമരാജൻ എന്നിവരുടെ ജാമ്യാപേക്ഷ പരിഗണിക്കുന്നത്​ വ്യാഴാഴ്​ചയിലേക്ക്​ മാറ്റി. അന്വേഷണം പൂർത്തിയായിട്ടില്ലെന്നും റിപ്പോർട്ട്​ വ്യാഴാഴ്​ച സമർപ്പിക്കാമെന്നും കേസ്​ പരിഗണിക്കുന്ന കോയമ്പത്തൂർ പ്രത്യേക വിജിലൻസ്​ കോടതിയിൽ ചൊവ്വാഴ്​ച പ്രോസിക്യൂഷൻ ബോധിപ്പിച്ചു. 

വി.സിയുടെ അറസ്​റ്റും തുടർനടപടികളും സംസ്​ഥാന ഭരണകക്ഷിയിൽ ആശങ്ക ഉയർത്തി​യിട്ടുണ്ട്​. മൂന്ന്​ മന്ത്രിമാർ, രാജ്​ഭവനിലെ രണ്ട്​ ഉദ്യോഗസ്​ഥർ ഉൾപ്പെടെ ഉന്നതർക്ക്​ സർവകലാശാലയിലെ അവിഹിത ഇടപാടുകളിൽ പങ്കുണ്ടെന്നാണ്​ സൂചന. ഇൗ സാഹചര്യത്തിൽ​ വിജിലൻസ്​ അന്വേഷണത്തിൽ മരവിപ്പ്​ പ്രകടമാണ്​. വി.സി ഉൾപ്പെടെയുള്ളവരെ കസ്​റ്റഡിയിൽ വാങ്ങാൻ പൊലീസ്​ കോടതിയിൽ അപേക്ഷ നൽകിയിട്ടില്ല. തൽക്കാലം കസ്​റ്റഡിയിലെടുക്കേ​െണ്ടന്നാണ്​ പൊലീസിന്​ മുകളിൽനിന്നുള്ള നിർദേശമെന്നറിയുന്നു.  
കേസിൽ പ്രതിചേർക്കപ്പെട്ട വിദൂരപഠന കേന്ദ്രം ഡയറക്​ടർ ആർ. മതിവാണൻ, തെളിവുകൾ നശിപ്പിച്ച കുറ്റത്തിന്​ പ്രതിചേർക്കപ്പെട്ട വി.സിയുടെ ഭാര്യ സ്വർണലത എന്നിവരുടെ അറസ്​റ്റും രേഖ​െപ്പടുത്തിയിട്ടില്ല. മതിവാണനെ കേസിൽനിന്ന്​ ഒഴിവാക്കാനും നീക്കമുണ്ട്​. ശക്തമായ നടപടികളുമായി പൊലീസ്​ മുന്നോട്ടുപോയാൽ ഭരണകേന്ദ്രങ്ങളുടെ പങ്ക്​ വിളിച്ചുപറയുമെന്ന്​ പ്രതികൾ ഭീഷണിപ്പെടുത്തിയതായി റിപ്പോർട്ടുണ്ട്​.   

മൂന്നുവർഷത്തിനിടെ ഗണപതി മുഖേന നിയമിക്കപ്പെട്ടവരിൽ 60 പേർ ഒാൺലൈൻ വഴിയാണ്​ കൈക്കൂലി തുക ​ൈകമാറിയതെന്ന്​ ഡയറക്​ടറേറ്റ്​ ഒാഫ്​ വിജിലൻസ്​ ആൻഡ്​ ആൻറി കറ​പ്​ഷൻ (ഡി.വി.എ.സി) അധികൃതർ കണ്ടെത്തി. ‘റിയൽ ടൈം ഗ്രോസ്​ സെറ്റിൽമ​​െൻറ്​’ ഒാൺലൈൻ ഏജൻസി മുഖേനയാണ്​ ഗണപതിയുമായി അടുപ്പമുള്ളവരുടെ ബാങ്ക്​ അക്കൗണ്ടുകളിലേക്ക്​ കോടികൾ മാറ്റിയിരിക്കുന്നത്​. കേസുമായി ബന്ധപ്പെട്ട റിപ്പോർട്ട്​ സംസ്​ഥാന സർക്കാറിനും ഗവർണർക്കും തിങ്കളാഴ്​ച അയച്ചതായി ഡി.വി.എ.സി കേന്ദ്രങ്ങൾ വ്യക്തമാക്കി. 

വി.സിയുടെ വീട്ടിൽനിന്ന്​ പൊലീസ്​ ഡയറി കണ്ടെടുത്തിരുന്നു. ഇദ്ദേഹത്തി​​​െൻറ ഫോൺകാൾ ലിസ്​റ്റും ശേഖരിച്ചു. വി.സിയുമായി അടുപ്പമുള്ള സർവകലാശാല ഉദ്യോഗസ്​ഥൻ ചില ഫയലുകൾ തീവെച്ച്​ നശിപ്പിച്ചതായും റിപ്പോർട്ടുണ്ട്​. കോടികൾ കൈക്കൂലി വാങ്ങിയെന്ന കേസുണ്ടായിട്ടും വി.സിയുടെ ഒൗദ്യോഗിക വസതിയിൽനിന്നോ തിരുച്ചിയിലെ സ്വന്തം വീട്ടിൽനിന്നോ പണം കണ്ടെത്താൻ പൊലീസിന്​ കഴിഞ്ഞിട്ടില്ല. തുടർന്ന്​ വി.സിയുടെ കുടുംബാംഗങ്ങളുടെയും അടുത്ത ബന്ധുക്കളുടെയും ബാങ്ക്​ അക്കൗണ്ടും ലോക്കറുകളും പരിശോധിക്കാൻ പൊലീസ്​ തീരുമാനിച്ചിരുന്നു. എന്നാൽ, മുകളിൽനിന്നുള്ള ഇടപെടൽ മൂലം കേസന്വേഷണം മന്ദഗതിയിലാണെന്ന്​ ആരോപണമുണ്ട്​. അഴിമതി സി.ബി.​െഎ അന്വേഷിക്കണമെന്നാണ്​ പ്രതിപക്ഷ കക്ഷികളു​ടെ ആവശ്യം.