ബംഗളൂരു ഈസ്​റ്റിലെ അക്രമം: കുറ്റപത്രം സമർപ്പിച്ചില്ല; 115 പ്രതികൾക്ക്​ ജാമ്യം

ബംഗളൂരു: പ്രവാചക നിന്ദ പോസ്​റ്റിനെ തുടർന്ന്​ ബംഗളൂരു ഇൗസ്​റ്റ്​ മേഖലയിൽ കഴിഞ്ഞ വർഷം അരങ്ങേറിയ അക്രമസംഭവങ്ങളുമായി ബന്ധപ്പെട്ട കേസുകളിൽ അറസ്​റ്റിലായ 115 പ്രതികൾക്ക്​ കർണാടക ഹൈകോടതി ജാമ്യം അനുവദിച്ചു. നിശ്​ചിത സമയത്തിനകം കുറ്റപത്രം സമർപ്പിച്ചില്ലെന്ന്​ ചൂണ്ടിക്കാട്ടിയാണ്​ പ്രതികൾക്ക്​ സ്വാഭാവിക ജാമ്യം അനുവദിച്ചത്​.

അന്വേഷണത്തിന്​ മൂന്നുമാസം കൂടി അനുവദിച്ച എൻ.​െഎ.എ പ്രത്യേക കോടതി ഉത്തരവും കേസ്​ പരിഗണിച്ച ജസ്​റ്റിസ്​ വിശ്വജിത്ത്​ ഷെട്ടി റദ്ദാക്കി. പ്രതികളുടെ വാദം കേൾക്കാൻ അവസരം നൽകാതെയായിരുന്നു ജനുവരി അഞ്ചിന്​ എൻ.​െഎ.എ കോടതിയുടെ ഉത്തരവെന്നും അന്വേഷണ കാലാവധി നീട്ടുന്ന വിവരം പ്രതികളെ എൻ.​െഎ.എ അറിയിച്ചിട്ടില്ലെന്നും ഹൈകോടതി ചൂണ്ടിക്കാട്ടി. ഇക്കാര്യത്തിൽ സുപ്രീംകോടതി ഉത്തരവുള്ള കാര്യവും കോടതി ഒാർമിപ്പിച്ചു.

2020 ആഗസ്​റ്റ്​ 12നായിരുന്നു പ്രതികളുടെ അറസ്​റ്റ്​്​. നവംബർ ഒമ്പതിനകമായിരുന്നു അന്വേഷണ സംഘം കുറ്റപത്രം സമർപ്പിക്കേണ്ടിയിരുന്നത്​. അന്വേഷണ കാലാവധി നീട്ടി നൽകണമെന്നാവശ്യപ്പെട്ട്​ നവംബർ മൂന്നിന്​ അന്വേഷണ സംഘം എൻ.​െഎ.എ പ്രത്യേക കോടതിയെ സമീപിച്ചു. കോടതി ഇൗ ആവശ്യം അംഗീകരിച്ചതോടെ​ പ്രതികൾ ഹൈകോടതിയെ സമീപിക്കുകയായിരുന്നു.

പുലികേശി നഗർ എം.എൽ.എ അഖണ്ഡ ശ്രീനിവാസ മൂർത്തിയുടെ സഹോദരീ പുത്രനും ബി.ജെ.പി അനുയായിയുമായ പി. നവീൻ പ്രവാചകൻ മുഹമ്മദിനെ അവഹേളിക്കുന്ന വിധത്തിൽ ഫേസ്​ബുക്ക്​ പോസ്​റ്റിട്ടതാണ്​ അക്രമത്തിന്​ വഴിവെച്ചത്​. ആഗസ്​റ്റ്​ 11 ന്​ രാത്രി​ എസ്​.ഡി.പി.​െഎ നേതാവ്​ മുസമ്മിൽ പാഷയുടെ നേതൃത്വത്തിൽ നവീനെതിരെ പരാതി നൽകി. ഇൗ പരാതിയിൽ പൊലീസ്​ നടപടിയെടുക്കാൻ വൈകിയതാണ്​ അക്രമത്തിലേക്ക്​ നയിച്ചതെന്നാണ്​​ ആരോപണം.

നവീ​െൻറ അറസ്​റ്റ്​ ആവശ്യപ്പെട്ട്​ പൊലീസ്​ സ്​റ്റേഷന്​ മുന്നിൽ തടിച്ചുകൂടിയ ജനം ഡി.ജെ. ഹള്ളി, കെ.ജി ഹള്ളി മേഖലയിലായി നടത്തിയ അക്രമത്തിൽ പുലികേശി നഗർ എം.എൽ.എയുടെ വീടിനും പൊലീസ്​ സ്​റ്റേഷനും റോഡരികിൽ നിർത്തിയിട്ട നിരവധി വാഹനങ്ങൾക്കും നാശനഷ്​ടമുണ്ടായി. വ്യാപക തീവെപ്പുമായി അഴിഞ്ഞാടിയ അക്രമികളെ പിരിച്ചുവിടാൻ പൊലീസ്​ നടത്തിയ വെടിവെപ്പിൽ മൂന്നുപേർ സംഭവസ്​ഥലത്തും ഒരാൾ പിന്നീട്​ ആശുപത്രിയിലും മരണപ്പെട്ടിരുന്നു. മിക്ക പ്രതികൾക്കെതിരെയും പൊലീസ്​ യു.എ.പി.എ ചുമത്തിയിട്ടുണ്ട്​്. അക്രമസംഭവങ്ങളുമായി ബന്ധപ്പെട്ട്​ രജിസ്​റ്റർ ചെയ്​തവയിൽ രണ്ട്​ കേസുകൾ 2020 സെപ്​തംബറിൽ എൻ.​െഎ.എ ഏറ്റെടുത്തിരുന്നു.