ഡോക്ടർമാരുടെ ശമ്പളം 11,000 രൂപ; നഴ്സിന് 15,000 രൂപ, വൈറൽ കുറിപ്പുമായി ബംഗളൂരു ഡോക്ടർ

ബംഗളൂരു: ഡോക്ടർമാർക്ക് ലഭിക്കുന്ന ശമ്പളത്തിലെ വിവേചനം ചൂണ്ടിക്കാട്ടി ബംഗളൂരുവിൽ നിന്നുള്ള ഡോക്ടർ. ഡോ. ജഗ്ദീഷ് ജെ ഹിരേമത്താണ് ഡോക്ടർമർക്ക് ലഭിക്കുന്ന വേതനത്തിലെ വിവേചനം സംബന്ധിച്ച് പോസ്റ്റിട്ടത്. അരുണാചൽപ്രദേശ് സർക്കാർ എം.ബി.ബി.എസ് ഡോക്ടർമാർക്ക് 11,000 രൂപ ശമ്പളമാണ് നൽകുന്നത്. കുക്കിനും വാർഡ് ബോയ്സിനും ഇ​തിനേക്കാൾ ശമ്പളമുണ്ടെന്ന് അദ്ദേഹം പോസ്റ്റിൽ പറയുന്നു.

അരുണാചൽപ്രദേശിലെ ഇറ്റാനഗറിലുള്ള കൃപ ഫൗ​ണ്ടേഷൻ ജീവനക്കാരെ തേടിയുള്ള പരസ്യം പങ്കുവെച്ചാണ് അദ്ദേഹത്തിന്റെ കുറിപ്പ്. യോഗ തെറാപ്പിസ്റ്റിനും പുരുഷ ​നഴ്സിനും 15,000 രൂപ ശമ്പളം ലഭിക്കുന്നുണ്ട്. കൗൺസിലർമാർക്കും ക്ലിനിക്കൽ സൈക്കോളജിസ്റ്റിനും ഡോക്ടർമാരേക്കാളും ശമ്പളം ലഭിക്കുന്നുണ്ടെന്ന് അദ്ദേഹം പറയുന്നു.

ഡോക്ടർമാർ വൈകാതെ ഈ അവസ്ഥയിൽ എത്തുമെന്ന് എനിക്കറിയാമായിരുന്നു. ഇന്ന് എല്ലാ ജില്ലയിലും ഒരു മെഡിക്കൽ കോളജ് ഉള്ളതിനാൽ യുവഡോക്ടർമാർക്ക് ഭാവിയിൽ ഈ തൊഴിൽ മേഖല കൂടുതൽ വെല്ലുവിളികൾ നിറഞ്ഞതായിരിക്കുമെന്നും അദ്ദേഹം പറഞ്ഞു.

സ്വകാര്യ മെഡിക്കൽ കോളജുകളിൽ പഠിക്കുന്നതിനായി കോടികൾ ചെലവഴിക്കുന്നതിന് മുമ്പ് നിങ്ങൾ ഇക്കാര്യം ശ്രദ്ധിക്കണം. നിങ്ങളുടെ പണം കൈയിൽ തന്നെ വെക്കുന്നതാണ് നല്ലത്. ഈ തൊഴിൽമേഖല തെരഞ്ഞെടുക്കുന്നതിന് മുമ്പ് ജോലി സാധ്യത ഉൾപ്പടെ കൃത്യമായി പരിഗണിക്കണം. ഈ തൊഴിൽമേഖലയിൽ അവസരങ്ങൾ കുറയുമെന്ന് മനസിലാക്കി തന്നെയാണ് തന്റെ മകനെ എൻജിനീയറിങ്ങ് പഠനത്തിനായി അയച്ചതെന്നും അദ്ദേഹം പറഞ്ഞു.