പ്രവാചക നിന്ദ പോസ്​റ്റ്​: പ്രതി നവീൻ കുറ്റം സമ്മതിച്ചു

ബംഗളൂരു: പ്രവാചകനെ അവഹേളിച്ച്​ ഫേസ്​ബുക്കിൽ പോസ്​റ്റിട്ടതി​ന്‍റെ പേരിൽ അറസ്റ്റിലായ പി. നവീൻ (26) കുറ്റം സമ്മതിച്ചതായി ഡി.ജെ ഹള്ളി പൊലീസ്​ വെളിപ്പെടുത്തി. ആഗസ്​റ്റ്​ 12ന്​ ഇയാളെ അറസ്​റ്റ്​ ചെയ്​തശേഷം ചോദ്യം ചെയ്യലി​ന്‍റെ ആദ്യ ഘട്ടത്തിൽ നവീൻ കുറ്റം നിഷേധിച്ചിരുന്നു. വിവാദ പോസ്​റ്റ്​ താനിട്ടതല്ലെന്നും ത​ന്‍റെ ഫേസ്​ബുക്ക്​ അക്കൗണ്ട്​ ഹാക്ക്​ ചെയ്യപ്പെട്ടതാണെന്നുമായിരുന്നു ഇയാളുടെ വാദമെന്ന്​ ബംഗളൂരു ഈസ്​റ്റ്​ ഡെപ്യൂട്ടി കമ്മീഷണർ എസ്​.ഡി. ശരണപ്പ പറഞ്ഞു.

പുലികേശി നഗർ കോൺ​ഗ്രസ്​ എം.എൽ.എ അഖണ്ഡ ശ്രീനിവാസ മൂർത്തിയുടെ സഹോദരീ പുത്രനാണ്​ അറസ്​റ്റിലായ നവീൻ. എം.എൽ.എയുടെ ബന്ധുവാണെങ്കിലും നവീൻ ബി.ജെ.പി അനുഭാവിയാണെന്ന്​ തെളിയിക്കുന്ന എഫ്​.ബി പോസ്​റ്റുകൾ​ കോൺഗ്രസ്​ പുറത്തുവിട്ടിരുന്നു.ഇയാളുടെ അറസ്​റ്റ്​ ആവശ്യപ്പെട്ട്​ ആഗസ്​റ്റ്​ 11ന്​ രാത്രി നടന്ന പ്രതിഷേധം ഡി.ജെ ഹള്ളി, ​കെ.ജി ഹള്ളി, കാവൽ ബൈരസാന്ദ്ര മേഖലയിൽ വ്യാപക അക്രമത്തിൽ കലാശിച്ചിരുന്നു. വിദ്വേഷ പോസ്​റ്റിനെതിരെ പരാതി നൽകിയിട്ടും നവീ​നെതിരെ പൊലീസ്​ നടപടി വൈകിയതാണ്​ അക്രമത്തിലേക്ക്​ വഴിവെച്ചതെന്ന്​ പ്രതിപക്ഷ പാർട്ടിയായ കോൺഗ്രസ്​ കുറ്റപ്പെടുത്തിയിരുന്നു.

പ്രതിഷേധക്കാർ ഡി.ജെ ഹള്ളി സ്​റ്റേഷൻ ആക്രമിച്ചതിന്​ പിന്നാലെ ലാത്തിച്ചാർജും ടിയർ ഗ്യാസ്​ പ്രയോഗവും ഫലിക്കാതെ വന്നതോടെയാണ്​ പൊലീസ്​ വെടിയുതിർത്തത്​. വെടിവെപ്പിൽ മൂന്നു യുവാക്കൾ മരിച്ചു.