വായ്​പ തിരിച്ചടക്കാൻ നവജാത ശിശുവിനെ തട്ടിയെടുത്ത്​ വിൽപ്പന നടത്തിയ ഡോക്​ടർ അറസ്​റ്റിൽ

ബംഗളൂരു: ബംഗളൂരുവിൽ നവജാത ശിശുവിനെ തട്ടിയെടുത്ത്​ വിൽപ്പന നടത്തിയ ഡോക്​ടർ അറസ്​റ്റിൽ. ചാമരാജ്​പേട്ടിലെ ആശുപത്രിയിൽ കഴിഞ്ഞവർഷമാണ്​ സംഭവം.

മനശാസ്​ത്രജ്ഞയായ ഡോ. രശ്​മി ശശികുമാറാണ്​ അറസ്​റ്റിലായത്​. ബന്നേർഘട്ടയിലെ സ്വകാര്യ ആശുപത്രിയിലെ ഡോക്​ടറാണ്​ ഇവർ. ബൃഹത്​ ബംഗളൂരു മഹാനഗര പാലിക മെറ്റേണിറ്റി ഹോമിൽനിന്ന്​ ഇവർ കുഞ്ഞിനെ തട്ടിയെടുക്കുകയായിരുന്നു. തുടർന്ന്​ ഇവരുടെ രോഗികളായ ദമ്പതികൾക്ക്​ ഇവർ കുഞ്ഞിനെ വിൽക്കുകയായിരുന്നു. 16ലക്ഷം രൂപക്കാണ്​ ഇവർ കുഞ്ഞിനെ വിറ്റത്​. വായ്​പ തുക തിരിച്ചടക്കാനാണ്​ കുഞ്ഞിനെ വിറ്റതെന്ന്​ ഇവർ പൊലീസിൽ മൊഴി നൽകി.

കുഞ്ഞിനെ തട്ടിക്കൊണ്ടുപോയതുമായി ബന്ധപ്പെട്ട്​ 20 അംഗ ​അന്വേഷണ സംഘത്തെ രൂപീകരിച്ചിരുന്നു. തുടർന്ന്​ സംശയമുള്ളവരുടെ ഫോൺ കോളുകൾ പരിശോധിച്ചതോടെയാണ്​ അന്വേഷണ സംഘം പ്രതിയെ തിരിച്ചറിയുന്നത്​.

എഴെട്ടു വർഷമായി ഡോക്​ടറുടെ ചികിത്സയിലായിരുന്നു ദമ്പതികൾ. ഇവരുടെ കുഞ്ഞിന്​ ശാരീരിക ബുദ്ധിമുട്ടുകളുണ്ടായിരുന്നതായാണ്​ വിവരം. ഇതോ​െട ദമ്പതികൾ മറ്റൊരു കുഞ്ഞിനെ വേണമെന്ന ആഗ്രഹം പ്രകടിപ്പിച്ചു. ആരോഗ്യ കാരണങ്ങളാൽ അത്​ സാധ്യമായിരുന്നില്ല.

തുടർന്ന്​ ഡോക്​ടർ വാടക ഗർഭപാത്രം സംഘടിപ്പിച്ച്​ നൽകാമെന്ന്​ വാക്കുനൽകുകയായിരുന്നു. വാടക ഗർഭപാത്രം സംഘടിപ്പിച്ചതായി ദമ്പതികളോട്​ കള്ളം പറയുകയും ചെയ്​തു. എന്നാൽ, നിരവധിപേരെ സമീപിച്ചിട്ടും നിരാശയായിരുന്നു ഫലം. പറഞ്ഞ സമയം കഴിഞ്ഞതോടെ ചാമരാജ്​​പേട്ടിലെ ആശുപത്രിയിലെത്തിയ ഡോക്​ടർ പിറകിലെ ഗേറ്റ്​വഴി കുഞ്ഞുമായി കടന്നുകളയുകയായിരുന്നു. തുടർന്ന്​ കുഞ്ഞി​െൻറ മാതാപിതാക്കൾ പൊലീസ്​ സ്​റ്റേഷനിൽ പരാതി നൽകി. തുടർന്ന്​ നടത്തിയ ​അന്വേഷണത്തിലാണ്​ ഡോക്​ടർ പിടിയിലാകുന്നത്​.

കുഞ്ഞിനെ വിലക്ക്​ വാങ്ങിയവർക്ക്​ ഡോക്​ടർ നടത്തിയ കുറ്റകൃത്യത്തെക്കുറിച്ച്​ അറിവില്ലായിരുന്നു. കുഞ്ഞി​െൻറ യഥാർഥ മാതാപിതാക്കൾക്ക്​ കുഞ്ഞിനെ കൈമാറിയതായും ഡി.സി.പി പറഞ്ഞു.