നാട്ടിൽ പോകണമെന്നാവശ്യപ്പെട്ട അന്തർസംസ്ഥാന തൊഴിലാളികളെ തൊഴിച്ചു; പൊലീസുകാരന്​ സസ്​പെൻഷൻ

ബെംഗലൂരു: നാട്ടിലേക്ക് തിരികെ പോകണമെന്ന് ആവശ്യപ്പെട്ടെത്തിയ അന്തർ സംസ്ഥാന തൊഴിലാളികളെ തൊഴിച്ച പൊലീസുകാരനെ സര്‍വീസില്‍ നിന്ന് സസ്‌പെന്‍ഡ് ചെയ്തു. നാട്ടിലേക്ക്​ തിരിച്ചെത്തിക്കണമെന്ന ആവശ്യവുമായി  പൊലീസ് സ്‌റ്റേഷനു മുന്നിൽ എത്തിയ തൊഴിലാളികളെ​ മർദിച്ച  കെ.ജി ഹള്ളി സ്​റ്റേഷനിലെ എ.എസ്.ഐ രാജാ സാഹെബിനെയാണ്​ സസ്​പെൻഡ്​ ചെയ്​തത്​.

നാട്ടിലേക്ക്​ മടങ്ങാനുള്ള സൗകര്യങ്ങൾ ​ഒരുക്കണമെന്ന ആവശ്യവുമായി ഉത്തർ പ്രദേശിൽ നിന്നുള്ള തൊഴിലാളികൾ ബെംഗലൂരു കെ.ജി ഹള്ളി പൊലീസ്​ സ്​റ്റേഷന്​ മുന്നിൽ സംഘടിക്കുകയായിരുന്നു. ഇവരോട്​ സംസാരിക്കാനെത്തിയ രാജാ സാഹെബ്​ സൗകര്യങ്ങൾ ഒരുക്കുന്നതുവരെ സമാധാനം പാലിച്ച്​ കഴിയണ​െമന്നും താമസ സ്ഥലങ്ങളിലേക്ക്​ മടങ്ങാനും ആവശ്യപ്പെ​ട്ടു.  തൊഴിലാളികൾ  പിൻമാറാൻ തയാറാകാതിരുന്നതോടെ നിയന്ത്രണം നഷ്​ടപ്പെട്ട എ.എസ്​.പെ രാജാ സാഹെബ്​ അവരെ ഭീഷണിപ്പെടുത്തുകയും ചവിട്ടി ഓടിക്കുകയുമായിരുന്നു.

തൊഴിലാളികളോട്​ മോശമായി സംസാരിക്കുന്നതും  കാലുകൊണ്ട്​ തൊഴിക്കുന്നതുമായ ദൃശ്യങ്ങൾ സമൂഹ മാധ്യമങ്ങളിലൂടെ പുറത്തുവന്നു. ഇതെ തുടർന്ന്​ രാജാ സാഹബിനെ സസ്‌പെന്‍ഡ് ചെയ്​തു. സംഭവത്തിൽ എ.എസ്​.ഐക്കെതിരെ  വകുപ്പ്​ തല അന്വേഷണം നടത്തുമെന്ന്​ പൊലീസ്​ സൂപ്രണ്ട്​ ശരണപ്പ അറിയിച്ചു. 

ബെംഗലൂരുവിൽ തന്നെ കോവിഡ് പരിശോധനാ ഫലത്തിൻെറ പകര്‍പ്പ് ആവശ്യപ്പെട്ട ആളില്‍ നിന്ന് സര്‍ക്കാര്‍ ഡോക്ടര്‍ കൈക്കൂലി ആവശ്യപ്പെട്ടെന്ന വിവരങ്ങളും പുറത്തുവന്നിട്ടുണ്ട്​. ബെംഗലൂരുവിൽ നിന്ന് 40 കിലോമീറ്റര്‍ അകലെയുള്ള മാലൂര്‍ ജനറല്‍ ആശുപത്രിയിലെ ഡോക്ടറാണ് കൈക്കൂലി ആവശ്യപ്പെട്ടതെന്നാണ് വിവരം. ഡോക്ടറോട് ജില്ലാ കലക്ടര്‍ വിശദീകരണം ആവശ്യപ്പെട്ടു.