അടിസ്ഥാന സൗകര്യങ്ങളുടെ മോശം അവസ്ഥ കാണാൻ മോദിയെ ക്ഷണിച്ച്​ ബംഗളൂരു പൗരന്മാർ

ബംഗളൂരുവിലെ അടിസ്ഥാന സൗകര്യങ്ങളുടെ അപര്യാപ്തതയും മോശം അവസ്ഥയും കാണാൻ പ്രധാനമന്ത്രി നരേന്ദ്ര മോദിയെ ബംഗളൂരുവിലേക്ക്​ ക്ഷണിച്ച്​ പൗരൻമാർ. കിഴക്കൻ ബംഗളൂരു സന്ദർശന വേളയിൽ നഗരത്തിലെ അടിസ്ഥാന സൗകര്യങ്ങളുടെ ‘ജീർണ്ണിച്ച’ അവസ്ഥ കണ്ട്​ മനസിലാക്കാൻ നരേന്ദ്ര മോദിയെ ശനിയാഴ്ച പൗരന്മാർ ക്ഷണിച്ചു. നിയമസഭ തെരഞ്ഞെടുപ്പ്​ അടുത്ത കർണാടകയിൽ ഉദ്​ഘാടന മഹാമഹവുമായി മോദി രംഗത്തുണ്ട്​. പുതിയ മെട്രോ പാത ഉദ്​ഘാടനത്തിന്​ മോദി എത്തിയ വേളയിലാ്​ പൗരൻമാരുടെ ക്ഷണം. ഈസ്റ്റ് ബെംഗളൂരുവിലെ സിറ്റിസൺസ് മൂവ്‌മെന്റ്, നഗരത്തിലെ അടിസ്ഥാന സൗകര്യങ്ങളായ അഴുക്കുചാലുകൾ, മലിനജലങ്ങൾ, പാലങ്ങൾ, റോഡുകൾ, തടാകങ്ങൾ എന്നിവ പ്രവർത്തനരഹിതമായ നിരവധി സ്ഥലങ്ങളുടെ ഫോട്ടോകളും വീഡിയോകളും ട്വീറ്റുകളുടെ പരമ്പരയായി നൽകി. പുഞ്ചിരിക്കുന്ന പ്രധാനമന്ത്രിയുടെ ഫോട്ടോയും ഒപ്പം നൽകി. .

“ബഹുമാനപ്പെട്ട നരേന്ദ്ര മോദി സർ, നിങ്ങൾ ഇന്ന് മഹാദേവപുരയിലായതിനാൽ ദയവായി സർജാപുര റോഡ് സന്ദർശിച്ച് കാർമലാരം പാലം കാണുക. പൊളിഞ്ഞ പാലം കണ്ടാൽ അഭിമാനം തോന്നും" എന്നായിരുന്നു ഒരു ട്വീറ്റ്. ഇതുപോലെ നിരവധി ട്വീറ്റുകളും പ്രത്യക്ഷപ്പെട്ടിട്ടുണ്ട്​.