ആ ഗർഭിണിക്ക്​ കോവിഡില്ല; അത്​ ലാബി​െൻറ പിഴവായിരുന്നു!

ബംഗളൂരു: ആ​േരാഗ്യ പ്രവർത്തകരെ മുൾമുനയിലാക്കിയ കോവിഡ്​ കേസി​​െൻറ സത്യാവസ്​ഥ ഒടുവിൽ പുറത്തുവന്നു. രോഗബാധിതരുമായി സമ്പര്‍ക്കമുണ്ടാവുകയോ യാത്ര പോവുകയോ ചെയ്യാത്ത ഗര്‍ഭിണിക്കാണ്​ കഴിഞ്ഞ ദിവസം കോവിഡ്​ സ്​ഥിരീകരിച്ചത്​.

എന്നാൽ പുനപരിശോധനയിൽ കോവിഡ്​ നെഗറ്റീവാ​ണെന്ന്​ തെളിഞ്ഞു. രോഗനിർണയത്തില്‍ സ്വാകര്യ ലാബി​ന്​ സംഭവിച്ച പിഴവാണ് തെറ്റായ ഫലത്തിന്​ വഴിവെച്ചതെന്ന്​ ആരോഗ്യവകുപ്പ്​ അറിയിച്ചു. 

പതിവു പരിശോധനയുടെ ഭാഗമായി ആശുപത്രിയില്‍ പോയ ഗര്‍ഭിണിയിൽനിന്ന്​ ആശുപത്രി അധികൃതർ കോവിഡ് പരിശോധനക്ക്​ സാമ്പിള്‍ ശേഖരിച്ചിരുന്നു. ഫലം പോസിറ്റീവായതോടെ ഇവരുടെ യാത്ര, സമ്പർക്ക പട്ടിക മുഴുവൻ പരിശോധിച്ചു. എന്നാൽ, സംശയകരമായി ഒന്നും കണ്ടെത്തിയില്ല.

തുടർന്ന്​ ഇവരുടെയും കുടുംബത്തിലെ ബാക്കിയുള്ളവരുടെയും സാമ്പിളുകള്‍ സര്‍ക്കാര്‍ ലബോറട്ടറിയില്‍ പരിശോധിച്ചു. ഈ പരിശോധനയിലാണ് രോഗമില്ലെന്ന് തിരിച്ചറിഞ്ഞത്. രണ്ട് തുടര്‍ പരിശോധനകളിലും ഫലം നെഗറ്റീവ് ആയിരുന്നു. നഗരത്തിൽ സാമൂഹിക വ്യാപനമുണ്ടായോ എന്ന ആശങ്കയാണ് ഇതോടെ  ഒഴിഞ്ഞത്.