ഡൽഹിയല്ല ബംഗാൾ: ‘ഗോലി മാരോ’ മുദ്രാവാക്യങ്ങൾ അനുവദിക്കില്ലെന്ന്​ മമത

കൊൽക്കത്ത: ഡൽഹിയിൽ കലാപത്തിന്​ വഴിയൊരുക്കിയ വിദ്വേഷ മുദ്രാവാക്യങ്ങൾ പശ്ചിമബംഗാളിൽ അനുവദിക്കില്ലെന്ന്​ മുഖ്യമന്ത്രി മമത ബാനർജി. ഡൽഹിയിലേതു പോലെ ‘ഗോലി മാരോ’ മുദ്രാവാക്യങ്ങൾ ബംഗാളിൽ അനുവദിക്കാൻ കഴിയില്ല. ഇത്​ ഡൽഹിയല്ലെന്ന്​ ഓർക്കണമെന്നും നിയമവിരുദ്ധമായി പ്രവർത്തിക്കുന്നവർ കനത്ത പ്രത്യാഘാതങ്ങൾ നേരിടേണ്ടിവരുമെന്നും മമത ബാനർജി തുറന്നടിച്ചു.

കഴിഞ്ഞ ദിവസം കൊൽക്കത്തയിൽ അമിത്​ ഷാ പ​ങ്കെടുത്ത റാലിയിലാണ്​ ‘ഗോലി മാരോ സാലോം കോ’ (അവരെ വെടിവെച്ചു കൊല്ലൂ) എന്ന മുദ്രാവാക്യം മുഴക്കിയത്​. പരിപാടി നടന്ന കൊൽക്കത്ത ഷാഹിദ് മിനാർ മൈതാനത്തേക്ക്​ ബി.ജെ.പി പതാകയുമായി വന്ന അണികളാണ്​ വിദ്വേഷ മുദ്രാവാക്യങ്ങൾ വിളിച്ചത്​.

കൊൽക്കത്തയിലെ തെരുവുകളിൽ ‘അവരെ വെടിവെച്ചിടൂ’ എന്ന മുദ്രാവാക്യം ഉയർന്നതിൽ അപലപിക്കുന്നു. ഇത്​ ഡൽഹിയല്ല, ഞങ്ങൾ അത്​ അനുവദിക്കുകയുമില്ല. നിയമം അതി​​െൻറ വഴിക്ക്​ നീങ്ങും. ആരെങ്കിലും നിയമവിരുദ്ധമായി പ്രവർത്തിക്കുന്നുവെങ്കിൽ അവർ അതി​​െൻറ പ്രത്യാഘാതങ്ങൾ നേരിടേണ്ടിവരും. പൊലീസ്​ മൂന്നുപേരെ അറസ്​റ്റു ചെയ്​തു കഴിഞ്ഞു -മമത ബാനർജി വ്യക്തമാക്കി.

ഡൽഹി കലാപം ആസൂത്രിക വംശഹത്യയാണ്​. ഡൽഹി പൊലീസി​​െൻറ നിയന്ത്രണം കേന്ദ്രസർക്കാറിനാണെന്നത്​ എല്ലാവർക്കും അറിയാം. സി.ആർ.പി.എഫ്​, സി.ഐ.എസ്​.എഫ്​, കരസേന എന്നീ സേനകൾ ഉണ്ടായിട്ടും എങ്ങനെയാണ്​ ഇത്​ സംഭവിച്ചത്​. 700ഓളം കലാപബാധിതരെ കാണാതായിട്ടുണ്ട്​. അവർ സുരക്ഷിതരായിരിക്കണമെന്ന്​ ആഗ്രഹിക്കുന്നുവെന്നും മമത പറഞ്ഞു.

ഗുജറാത്ത്​ മോഡൽ വംശഹത്യയാണ്​ ബി.​െജ.പി ഡൽഹിയിലും ആസൂത്രണം ചെയ്​തതെന്ന്​ മമത നേരത്തെ ആരോപിച്ചിരുന്നു.